3-anyos gilugos og 8-anyos

CEBU, Philippines - Usa ka 3-anyos nga bata ang gilugos sa 8- anyos silingan sa habagatang bahin sa Sugbo sumala pa sa Provincial Council for the Welfare of Children (PCWC).  Matud ni Hedda Largo ang gender and development officer sa PWC ang 5-anyos nga igsoon sa biktima nakakita sa panghitabo ug maoy misumbong sa inahan nga gikan pa naninda.

Matud ni Largo gibilin ra ang managsuon diha sa ilang balay dihang nisulod ang 8-anyos nilang kaduwa ug gilugos kini. Ang inahan maoy nakabantay sa nagkadugo nga bilahan sa anak ug nisumbong ang magulang sa nahitabo.

Gikompirmar sa mga doktor sa Vicente Sotto Memorial Medical Center nga nahilabtan kini. Si Bise Gob. Agnes Magpale nagtuo nga nasuhid sa mga bata ang paghimo og krimen o malaw-ay nga buhat  sa internet nga “piso-piso.”

Samtang naputos og bun-og ang psychology graduate nga 22-anyos nga  dalagang misukol sa misuway og lugos kaniya sa sud sa balay sa iyang ig-agaw sa Phase 2 Deca Homes, Barangay Dumlog, Dakbayan sa Talisay.

Ang biktima nag-inusara sa balay dihang naabot ang suspek nga si Gerard Abcede, 31, nga nagsuot og helmet ug nagpakaaron-ingnong mag-inspeksyon sa ilang balay kay nangliki na man. Apan diha sa sud nabantayan sa biktima nga straw ra ang gigamit sa suspek pagsukod ug gikulbaan siya dihang gihubo sa suspek ang helmet kay ang ila diay kadtong silingan nga magsige og tutok kaniya.

Mosinggit unta siya apan gipugngan siya niini ug gisuwayan paghubo iyang shorts maong nakiglayog siya aron makabuhi hinungdan sa daghan niyang mga pangos ug bun-og sa lawas, nawong, batiis ug liog ug nakaresponde ang mga silingan ug nadakpan si Abcede. Ang suspek mihimakak sa pasangil. 

Si PO3 Junyl Ater sa Talisay City Police Station mipahimangno nga dili gyud mopasulod og tawo kun wa sila makaila. Le Antojado ug Gabriel Bonjoc (BANAT NEWS)