Comelec sa kalungsoran gilangaw

CEBU, Philippines - Kung ubay ubay ang miapas pagparehistro sa mga malls sa mga dakbayan diri sa Sugbo sama sa Lapu-Lapu, Mandaue ug Cebu City, nagpabilin gihapon nga mingaw ang mga buhatan sa Comelec sa kalungsoran sa uwahing adlaw sa registration niadtong Sabado.

Si Atty. Marco Lionel Castillano, provincial election supervisor miingon nga manageable lang ang mga nagparehistro niadtong Sabado.

Matud niya nga moabot ra ngadto sa 20 ngadto sa 30 ang nagparehistro sa mga kalungsoran sa mga Comelec offices , apan lahi kini sa nahitabo sa Talisay, Mandaue ug Lapu-Lapu nga gidagsa gyud og mga gustong magparehistro.

Base sa datus sa Comelec sa probinsya sa Sugbo niadtong Abril 22, moabot ngadto sa 2.9 milyones ang mga botante sa barangay election ug kapin usa ka million sa Sangguniang Kabataan ang nagparehistro.

Ang maong gidaghanon nadugangan pa kini human sa natapos nga registration niadtong Sabado.

Ang Comelec, miawhag kaniadto sa Kongreso nga sa bulan sa Hunyo madesisyonan na kun madayon ba o dili ang piniliay sa Barangay ug SK karong Oktubre.

Kini aron dili na makagasto pa ang Comelec alang sa bidding sa mga supplies ug pagprinta sa balota alang sa election. (BANAT NEWS)