Mga entries sa 3yo fillies & Colts stakes

MANILA, Philippines - Maraming mga kabayo ang nominado para makatakbo sa gaganaping Three Year Old Local Fillies & Colts Stakes race sa Abril 9  sa karerahan ng San Lazaro Leisure Park, Carmona Cavite.

Nangunguna na rito ang mga panlaban ni businessman/sportsman Joseph Dyhengco na Greatwall at Hiway One na parehong lalake kung kaya’t magdadala sila ng 54 handicap weights.

Ang ilan pang mga lalakeng kabayo sa pareho ring timbang ay ang Biglang Buhos, Band Of Halo, Headmastership, Metamorphosis, Mount Pulag at Pangalusian Island.

Apat na babaeng kabayo naman ang naiprisinta ng kani-kanilang handlers. Sila ay mayroong 52 handicap weights. Ito ay ang April’s Song, Lemonada, Magic Carpet Ride at Secret Affair.

Ang distansiya ng labanan ay para sa 1,600 meters. At naglaan ng P1-milyon papremyo ang Philippine Racing Commission. Ang P600,000 rito ay para sa magwawagi.

Sa runner-up ay P225,000 samantalang sa third placer ay P125,000 at sa fourth place ay P50,000. Mayroon pa ring breeder’s purse na P30,000 sa kampeong kabayo. JMacaraig