Kagawad gipatay
CEBU, Philippines - Patay ang usa ka konsehal sa barangay human kini pusila sa iyang higala samtang nagtan-aw og telebisyon sulod sa ilang balay diha sa Damolog, Sogod pasado alas 6 niadtong nakalabay nga hapon.
Ang konsehal giila nga si Roberto Abalos, 60, samtang ang gitudlo nga suspetsado sa krimen mao ang amahan ug anak nga sila si Sam Pandapatan, ug si Swylee nga giingong lumad nga taga Marawi City.
Ang hepe sa Sogod Police nga si Sr. Insp. Danilo Santillan mitug-an nga sa pagkakaron “love triangle” ang ilang nakita nga motibo sa maong krimen.
Ang suspetsado gikatahong adunay negosyo nga cellphone repairs diha sa Sogod, Catmon, Compostela ug dakbayan sa Danao.
Matud pa ni Santillan nga suod nga managhigala ang konsehal ug si Sam, apan duna siyay nakuhang impormasyon nga malagmit nasuko ang suspetsado human nagkarelasyon ang kagawad sa kanhi hinigugma sa suspetsado.
Gikatahong duha na ka bulan nga nagkabulag ang babaye ug ang suspetsado. Nasayran usab ni Santillan nga taud-taod na nga nawala sa ilang dapit ang suspetsado apan niadtong nakalabay nga adlaw kalit kining nagpakita sa maong dapit.
Sa imbestigasyon sa kapulisan nagtan-aw og tv ang biktima dihang gisaka kini sa suspetsado ug gipusil sa ulo, samtang ang iyang anak ang nagsilbing lookout. Human sa krimen dali nga misibat ang duha.
Dali nga nipakatap og hulagway sa duha ang mga polis diha sa mga terminal ug pantalan tungod sa pagtuong mosibat ang duha. (BANAT NEWS)
- Latest
