“Pinoy Pride 40” card kompleto na

CEBU, Philippines - Kompleto na ang baraha alang sa “Pinoy Pride 40” event diin si Donnie ‘Ahas’ Nietes nagtinguha nga mosakmit og world title sa ikatulo nga weight division sa iyang pakigsangka batok ni Komgrich Nantapech sa Thailand alang sa IBF flyweight title karong Abril 29 diha sa Waterfront Cebu City Hotel and Casino.

Si super bantamweight Virgil Vitor (9-1, 6KOs) sa Tagbilaran City makigtakus batok sa beteranong si Michael Escobia (11-14-1, 3KOs) sa Manila, ang bag-ong ALA boxer nga si flyweight Junrel Jimenez  (6-1, 3KOs) makigtigi ni Ramel Antaran (2-4-1) sa General Santos, samtang ang wa’y pildeng si Kenneth Paul Gentallan (5-0, 3KOs) sa Tagbilaran makigpinaksitay ni John Kennan Salvador (6-2-2, 2KOs).

Magbangga sab silang Esneth Domingo (5-0-0, 4KOs) sa Sultan Kudarat ug Romulo Ramayan (7 -10-3, 3KOs) sa Valencia City, Bukidnon ug ingon man silang Christian Bacolod (6-0-0, 5KOs) ug Mike Kinaadman (5-1-2, 4KOs) nga pulos bug-at og mga kinumo.

Human nila, si Mark ‘Magnifico’ Magsayo makigbugno dayon ni Issa ‘Peche Boy’ Nampepeche sa Tanzania, samtang si Jeo ‘Santino’ Santisima moharong ni Master Suro sa Indonesia.

Sa laing bahin, sila si Nietes, Magsayo ug Santisima mopahigayon sa ikaduhang hugna sa ilang public workout karong alas-5  hapon diha sa Robinsons Galleria Cebu. (BANAT NEWS)