Online camp molabyog sa Davao

CEBU, Philippines - Ang 2017 edition sa Online Basketball Training Camp  dad-on sab didto sa dakbayan sa Davao karong Abril 20 didto sa Blue Gym.

Gawas sa Davao, ang tinuig nga clinic mopatighog sa Gingoog City, Salay ug Medina sa Misamis Occidental ug ingon man sa Tubigon, Bohol.

Samtang ang Cebu leg mosikad karong Abril 3 sa duha ka binyu, diha sa Cebu Eastern College gym ug Minglanilla Sports Complex agi’g pagtambayayong sa Minglanilla LGU ubos sa liderato ni Mayor Elanito Peña.

Ipahigayon ang hinashasay matag adlaw gikan sa alas-8 hangtod sa alas-11 sa buntag sa CEC gym ug gikan sa ala-1:30 hangtod sa alas-4:30 sa hapon didto sa Minglanilla.

Si camp director Mark Anthony Tallo, kanhi PBA player ug amahan ni collegiate star Mark Jayven Tallo sa Southwestern University-Phinma Cobras, nagkanayon nga ang Online camp dunay labing bag-o nga ekipo nga gikinahanglan sa paghashas ug pagpalambo sa abilidad sa mga batan-ong basketbolista.

Ang registration sa maong usa ka bulan nga training camp nagkantidad og P1,300, apil na niini ang upper uniform ug libreng bola. Alang sa dugang mga detalye, kadtong mga interesado mahimong motawag sa 0923-4001318 o 0905-8139093. (BANAT NEWS)