Taga MCWD kinsa’y nakakuwarta?

Wala ba kaha’y nanguwarta sa mga kawani sa Metro Cebu Water District (MCWD) kay gibaliwala man nila ug wala tumana ang kamandoan gikan sa ilang labaw?

Ang linya gud sa tubig para diha sa Upper Fatima nga sakop sa Barangay Apas, para lang gyud sa 20 ka balay, base sa gidak-on sa tubo nga gigamit sa MCWD. Diha nga si Rene Mercado mao pa ang chairman sa MCWD, gipasidan-an gyud ang mga kawani nga dili na dugangan pa ang koneksyon nga anha mokuha og tubig sa maong linya, aron dili masakripisyo ang tua sa tumoy.

Kada gabii ra moagas ang tubig dihang dapita, ug mosamot na kini kahinay kun modaghan na ang mga linya nga ilang gikonektar? Duna gyuy mga kawani sa MCWD nga miinsister sa pagkonektar ug bag-ong tubo diha sa koneksyon nga nagsubay gikan sa Busay Barangay Hall.

Nahitabo ni sa hinapos nga bahin sa miaging tuig. Giputol sa mga kawani sa MCWD ang plastik nga tubo sa tubig ug sa tanto nila nga pagdali-dali, nasampongan og mga lapok ug wala na moagas ang tubig paingon sa Sitio Fatima, nga nahimutang sa Upper Apas.

Napugos gud intawon si Mercado pag-adto aron pagsulbad sa problema. Tuod, mipasalig ang MCWD nga dili na sila modugang og koneksyon didto sa maong sub-out nga kwestyonable nga gihimo sa tingali nanguwarta nilang kawani.

Apan kaniadtong miaging semana, napun-an na usab og koneksyon didto gihapon sa maong sub-out nga ilang gihimo. Pastilan, pagtarong mo diha uy. Kinsa man gyud ang nakakuwarta niining maong mga palusot diha sa MCWD?

* * *

Husto gyud kaayo ang gihimo ni Ligglig Maranga, ang hepe sa Barangay Disaster Center sa Barangay Suba, Dakbayan sa Sugbo, nga nanglimpyo na siyang daan sa mga kanal mentras wala pa moabot ang ting-uwan. Kini maoy giingon nako sa akong lindog sa The Freeman. Samtang nanglimpyo na sa drainage system ang mga sakop sa Barangay Disaster Center sa Suba, sa ubang barangay ingon man ang City Hall, wala pa molihok.

Mapaabot nato nga kun bundakan og kusog nga uwan ang dakbayan, makasinati na usab og grabeng paglunop ang mga lupa nga dapit sa siyudad. Sunda ninyo si Ligglig aron mamenos ang problema sa paglunop diha sa tagsa-tagsa ninyo ka dapit.

Kining ubang kawani sa kagamhanan, maayo lang modawat og sweldo nga dili motrabaho. Mas maayo pa ang mga tawo nga walay sweldo kay motrabaho pa alang sa kaayohan sa kadaghanan.