Baratilyo nga balaudnon

Inay magsaulog, angay’ng manlipaghong sa kauwaw si Presidente Rodrigo Duterte sa laktod nga pagpasar sa iyang mga alyado sa House of Representatives sa balaudnon nga mobanhaw sa silot sa kamatayon.

Kay gawas nga nabaratilyo ang balaudnon sa makauuwaw nga linaslasay sa orihinal nga listahan sa bangis nga mga krimen nga pahamtangan og kamatayon, nabisto pa gyud ang katandugon sa iyang mayoriya sa Kongreso.

Mas lisud na nga makalusot ang balaudnon sa Senado kay bisan gamitan pa sa samang pagsiging-siging, ang mga senador dili sama kasayon nga hudlaton. Gawas nga nabantang na ang mga buslot sa iyang pamunoan.

* * *

Atubangan sa talagsaong popularidad ni Duterte ug sa kahingpit sa iyang mayoriya, nga pito na lang gani ka kongresista ang nideklarar sa ilang kaugalingon nga mao na lay nagpabiling nagbarug batok sa mga maniobra sa iyang mga alyado sa House, makapakugang ang kalisod nga nahiagoman sa mga sinaligan sa Malakanyang sa pagpalusot sa death penalty bill.

Klaro nga wa magsilbi ang abunda nga panghulga nilang House Speaker Pantaleon Alvarez ug kaubanan mao nga napugos sila sa pagtagud-tagod sa balaudnon aron lang mapasar sa labing dali nga panahon takdo sa apurado nga kalendaryo ni Duterte.

* * *

Labing makauuwaw nga samang mga kongresista nga nimaniobra sa pagtangtang sa plunder, rape, treason ug ubang pintas nga mga krimen atol sa deliberasyon sa House, karon mao na sab ang nagpapogi atubangan sa publiko nga maningkamot na sab sila nga masukip pagbalik ang natangtang nga mga krimen.

Nakalimot sila nga ang botasyon sa niaging gabii alang na sa ikatulo ug katapusang pagbasa, busa mao na ang bersiyon nga ipadala sa Bicamercal Conference Committee kun mapasar ang samang balaudnon sa Senado.

* * *

Bisan 70% sa mga kongresista ang nibotar sa balaudnon, angay’ng kuyawan ang Malakanyang sa kaisog sa pipila sa iyang mga alyado nga nisukwahi niya bisan sa mga hulga nga tangtangan sa mahinungdanong mga katungdanan sa House.

Dili diay niya madiktahan ang iyang mga alyado sa bisan unsa na lang nga iyang mahunahunaan. Kabalak-an sab ang pagkapugos nilang Alvarez ug kaubanan sa paghimulbol sa orihinal nga bersiyon sa balaudnon kay may kahigayonan nga dili kadto mao ang katapusan nila nga paglubay-lubay aron pagtagbaw sa bisan unsa nga mahunahunaan sa ilang mga pangulitawhan. ([email protected])