Thai Princess nibisita sa Oslob

CEBU, Philippines - Nisaksi si Princess Sirivannavari Nariratana saThailand sa mga butanding sa Lungsod sa Oslob sa habagatang bahin sa Probinsiya sa Sugbo kagahapon.

Matud ni Police Officer 2 Noel Mamale sa Oslob Police Station nga niadtong Pebrero 17 gitawgan sila sa ilang headquarters sa Cebu Provincial Police Office nga i-secure ang lugar sa pag-abot sa prinsesa nga anak nilang King Vajiralongkorn ug Sujarinee Vivacharawongse.

Alas 5:45 sa hapon niadtong Biyernes niabot ang prinsesa kauban sa iyang mga security ug didto niistar sa Isla sa Sumilon.

Matud ni Mamale nga kagahapon sa alas 7:40 sa buntag si Nariratana nag-whale shark watching ug nisawom sulod sa 30 minutos.

Tungod kay nalingaw kini sa alas 10:30 sa buntag nisawom kini pagbalik aron pagsaksi sa mga whale sharks.

Si Mamale nagkanayon nga kutob ra kagahapon ang pagbisita sa prinsesa.

Samtang nisaka ang ihap sa mga turista sa maong lungsod bisan sa nanggawas nga taho sa presensiya sa mga terorista.

Matud sa information officer sa lungsod, Roger Serna, nga human sa pagbisita sa mga kandidata sa Miss Universe sa niaging buwan, nagpabiling malinawon ang lugar ug hugot nga seguridad ang padayon nga gipatuman.

Gibutyag sab ni Serna nga mas nisaka sab ang kita sa turismo sa ilang lungsod sa 2016 kung itandi sa 2015 tungod kay P71 milyones lang ang ilang kita sa 2015 samtang ang ilang kita sa 2016 niabot sa P103.7 milyones.

Si Serna niawhag sa katawhan nga padayon gihapong mobisita sa ilang lungsod tungod kay nindot ang lugar ug luwas kining suroyan. - /GMR) (BANAT NEWS)