Duterte misubli pagsulti nga si Rama drug protektor

CEBU, Philippines - Wala pa gani maalim ang kasakit nga gihambin ni kanhi mayor Michael Rama tungod sa paghingalan kaniya ni Presidente Duterte nga usa ka drug protektor, ang presidente misubli na usab paghimo sa maong pasangil kaniadtong Biyernes sa gabii.

Giangkon ni Rama nga nauwawan na gyud kaayo siya ug ang iyang pamilya sa gihimo ni Presidente Duterte nga iyang gihulagway nga walay basehanan. Hinoon, sayop ang gisulti ni Presidente Duterte kay iyang giingon nga ang governor sa Sugbo nga si Rama usa ka drug protektor.

“I’ve name him before, and I’ll name him again. Si governor sa Cebu, protector, eh,” matud ni Duterte. Bisan og sayop ang pag-ingon ni Duterte nga si Rama governor sa Sugbo, apan nakasabot ang kanhi mayor nga siya ang gipasabot.

Sa usa ka pakigpulong ni Duterte, iyang gibasa ang listahan sa giingon niya nga mga drug protektors ug naapil niini ang ngalan ni kanhi mayor Rama. Dihang gikuhaan og pamahayag sa Banat News kagahapon, si Rama midumili sa paghatag og reaksyon.

Nahibaw-an nga daghang mga opisyal ang giduol ni Rama aron unta magkahinabi sila ug si Duterte sa tumong nga pasabton niya nga dili tinuod ang report nga siya nagproteher og drug lord, apan walay nitabang kaniya.

Bisan og ang paghingalan kang Rama nakapauwaw kaniya, apan dili siya makapasaka og kaso sa presidente samtang anaa pa kini sa katungdanan. Si Mayor Tomas Osmeña nga gikuhaan og reaksyon kabahin niining labing ulahi nga paglambigit ni Duterte kang Rama sa ilegal nga drugas, si Osmeña igo lang miingon, “It means Rama may go back to Binay or De Lima.”

Gikatahapan si Rama nga nagproteher sa ilegal nga drugas. Hinoon si Rama miingon nga kun hatagan siya’g higayon nga magkahinabi ug ang presidente, iya kini nga pasabton ngano nga bakak ang pasangil kaniya.

Apan si Duterte daan na nga miingon nga ang listahan sa mga drug lord ug sa ilang mga protektor nga iyang gihuptan, gihatag kaniya sa kapolisan ug militar. (BANAT NEWS)