Madre ug bata gimilagrohan ni Camomot

CEBU, Philippines - Usa ka mother superior sa Poor Claire Monastery sa Surigao City ug bata gikan sa kaulohan ang nakaangkon og kaayohan sa ilang gihambin nga sakit human nihigda sa katre ni Archbishop Teofilo Camomot.

Gitug-an ni Rev. Mo. Louella Grace Buscato, ang provincial superior sa Daughters of Saint Teresa sa Valladolid, Dakbayan sa Carcar nga adunay tumor sa pituitary gland ug naapektahan ang tuo nga mata niini. Gitambagan na kini sa mga batid nga doktor sa kaulohan nga kini operahan. Nangayo kini’g second opinion sa laing espesyalista apan gibalibaran nga dili siya operahan kay risgo ug walay kasigurohan.

Sumala pa ni Buscato, nangindahay si Mother Rebecca nga makabisita sa lubnganan ni Archbishop Camomot, hinungdan nga gikuyogan kini sa duha ka mga madre nga maoy niasistar kaniya aron makaabot sa Sugbo niadtong Miyerkules sa buntag. Matud ni Mother Buscato nga sa pagbisita sa maong madre sa kapilya ni Archbishop Camomot, gipahigda kini sa katre sa arsobispo ug nangaliya nga nagpiyong ang mata, samtang ang kamot niini naghupot sa hulagway ni Camomot.

Gibutyag ni Buscato nga pipila ka gutlo sa pagpangaliya sa maong mother superior, giingong nakasinati kini og kagaan sa iyang ulo ug sa iyang mga mata. Paghuman sa iyang pag-ampo, nanghilak ang mga madre nga kuyog niini ug nidagan paingon sa iya opisina nga naghilak kay nakabuka na ang mata sa ilang superyora. Si Buscato, nitug-an nga dali unta niyang giadto ang maong madre apan iya na kining nasugatan nga malipayon.

Samtang nakighinabi siya sa maong madre, hinay-hinay usab nga nibuka pa ang mata niini, nawala na ang lagum sa iyang mata ug nakakita na kini og klaro. Nasayran nga si Mother Rebecca mobalik unya atol sa adlaw nga natawhan ni Archbishop Teofilo Camomot karong Marso 3.

Human sa instant miracle nga naangkon ni Mother Rebecca, gihulagway ni Buscato nga malipayon ang hulagway ni Archbishop Camomot.

Laing gibutyag ni Buscato nga niadtong Martes sa gabii, aduna usab usa ka pamilyahan gikan sa kaulohan ang nakasinati og kaayohan sa sakit dihang usa sa mga anak niini ang makalihok na sa iyang lawas human nihigda gihapon sa katre nga kanhi katulganan ni Camomot.

Giawhag ni Buscato ang maong pamilya sa dihang nakalakaw na nga mopadala sa ilang kasinatian sa kaayohan sa sakit nga giayo sa Servant of God nga si Archbishop Camomot. (BANAT NEWS)