Nanuyop, sugarol gipangsikop

CEBU, Philippines - Bisan og gihunong ang anti-drug operations sa kapolisan, duha ka lalaki, nasikop sa Mobile Patrol Group sa Cebu City Police Office human ilang naaktohan nga nanuyop og shabu sa Sitio Riverside, Brgy. Sambag 2 kagahapon sa buntag.

Ang mga nadakpan mao sila si Ian Meneses ug Paul Carmen. Paingon na untang mamalik sa ilang kampo ang mga sakop sa MPG dihang giduol sila og concerned citizen ug gipahibawo sa gihimo sa mga dinakpan nga anaa sulod sa barong-barong.

Naabtan sa kapolisan sa akto ang mga suspek nga naghingos og shabu ug nakuhaan pa og usa ka pakete ug drug paraphernalia.

Sa Dakbayan sa Talisay, ang mga sugarol sab ang ilang gipangdakop

Niadtong Martes sa hapon, lima ka tawo ang nasikop kay nagduwa og hantak sa Tabunok Public Market.    Ang mga nadakpan mao sila si Nicolas Jerusalem taga Brgy Ibo, Lapu-Lapu City, Christopher Sestoso, taga Brgy Bulacao, Benboy Echavez, taga Brgy Tabunok; Allen Amadora, taga Brgy Lagtang ug si Saturnino Randa, taga Brgy Jaclupan. Ang kapolisan nakadawat og tawag gikan sa concerned citizen mahitungod sa grupo sa mga lalaki nga naghantak. Niresponde dayon sila hinungdan sa pagkasikop sa lima. Gabriel C. Bonjoc ug Jomari Fernandez (BANAT NEWS)