Pusher sa Tejero sikop sa NBI
CEBU, Philippines - Nasikop sa mga sakop sa National Bureau of Investigation ang tulo ka tawo kinsa usa kanila minor de edad sa buy-bust operation sa Laurente, Tejero, Dakbayan sa Sugbo kagahapon sa hapon. Nasikop mao sila si Aireen Ompad, 23, taga Basak, Dakbayan sa Lapu-Lapu; Arvin Arnaiz, taga Ponce, Tejero ug ang 15-anyos nga batan-on.
Matud ni NBI agent Arnel Pura nga ilang target si Arnaiz apan kalit kining nidagan sa balay ni Ompad.
Gisuhid ang balay ni Ompad diin nakuha ang 100 gramos sa gituohang shabu.
Si Arnel Ardeño kinsa kapuyo ni Ompad ang wala sa panimaye niadtong higayona.
Nakuhaan sab ang minor de edad og usa ka medium-sized nga shabu, usa ka .38 revolver ug laing usa ka gamay nga revolver nga dunay pipila ka bala.
Gibana-bana nga moabot og P1.2 milyones ang balor sa shabu nga nasakmit. Laing upat ka tawo nga naaktuhang nagsuyop sa maong dapit ang apil sab sa gidakop sa NBI.
Ang minor de edad ang itugyan ngadto sa Department of Social Welfare and Development samtang ang uban ang gibalhug sa detention cell sa NBI.
Nagkanayon si Tejero barangay konsehal Garry Lao nga nalipay siya sa pagkasikop sa mga tawo nga nalambigit sa ilegal nga drugas sa ilang lugar. (BANAT NEWS)
- Latest
