PDEA tabangan sa siyudad

CEBU, Philippines - Suportado sa kagamhanan sa Siyudad sa Sugbo ang Philippine Drug Enforcement Agency sa pagpahigayon sa anti-illegal drug operation subay sa pag-suspenso sa “Oplan Tukhang” sa kapolisan.

Si Mayor Tomas Osmeña nagpaabot nga moduol kaniya ang kadagkuan sa PDEA-7 sanglit wala siya nasayud kung unsay gikinahanglan sa ahensiya.

May kabalaka hinoon si Osmeña tungod kay nagkuwang og tawo ang PDEA-7 alang sa dako nga responsibilidad.

“Dili lang kuwang sa tawo, it’s the confusion, because the people are there you mean we cannot do anything na, it creates a dysfunction, ako ang mayor what do I do now, what’s my role, first they remove my commanders, now they remove the police,” matud ni Osmeña.

 Sa iyang bahin, si Cebu Archbishop Jose Palma nisuporta sa internal cleansing sa Philippine National Police ug nihulagway nga usa ka maayong lakang ang paghunong una sa drug operations.

Matud ni Palma nga labing maayo nga i-review una ang gipatuman nga programa sa administrasyon ni Presidente Duterte nga gisuportahan sa simbahan nga nipatuman sab og rehabilitation program sa drug surrenderers.

Sumala pa ni Palma nga ang paglimpyo sa han-ay sa kapolisan ug paghunong sa “Oplan Tukhang” maghatag og higayon sa pagsusi sa resulta sa programa ilabi na nga ubay-ubay na ang nakalas sa mga operasyon.

Alang kang Gobernador Hilario Davide III dili angay nga undangon sa kapolisan ang operasyon batok sa ilegal nga drugas samtang limpyuhan ang organisasyon gikan sa mga scalawags.

Samtang dismayado ang Association of Barangay Councils sa Dakbayan sa Lapu-Lapu sa paghunong sa operasyon sa kapolisan batok sa ilegal nga drugas. Matud sa presidente sa ABC, Kapitan Jose Dungog, nga manglugwa na unya ang mga tiggamitan ug tigpayuhot og ilegal nga drugas sanglit wala nay kahadlokan.

Sumala pa ni Dungog nga lahi ra gyud kung ang kapolisan ang mohimo sa operasyon sanglit nakahibawo kini sa mga lugar diin naghitak ang ilegal nga drugas. Nagtuo si Dungog nga manakop gihapon ang kapolisan kung may maaktuhan nga namaligya ug naggamit og drugas sa usa ka lugar. Decemay P. Padilla, Rowena D. Capistrano, Le Phyllis F. Antojado ug USJR Intern Lendilyn Alquilos (BANAT NEWS)