Eddiegul nasuko sa hepe sa Talisay jail

CEBU, Philippines - Nasuko si Talisay City Mayor Eduardo Gullas human niya nasayran nga gitugtan sa pangulo sa Bureau of Jail Management and Penelogy (BJMP) Talisay City Jail nga ibutang ang 20 ka piniriso gikan sa Minglanilla.

Napungot si Mayor Gullas kay wala siya pahibaw-a ni JCInsp. Josephus Jelianggao kabahin niini.

 Ang mayor mismo maoy nitawag kang Jelianggao aron ikumpirmar ang maong taho. Iyang gipadayag ngadto sa hepe sa Talisay City Jail  nga isip mayor angay siyang masayod sa kalihukan sa prisohan.

 Igo lang sa pagpangayo og pasaylo si Jelianggao atol sa ilang panag-istorya ug niingon kini nga aduna siyay nadawat nga court order hinungdan nga iya gipasulod ang maong mga priso.

 Apan si Gullas wala motuo nga adunay court order kay posibleng iya na lang kadtong rason. Duda sa mayor nga nihangyo kaniya ang warden sa laing lungsod o ba kaha aron siya madayeg sa iyang labaw sa BJMP.

 Asoy pa sa mayor nga maayo man nga makatabang sa laing lugar apan sa sitwasyon sa Talisay City Jail nga naghuot na,  basin unya og dili na kini makontrolar sa mga tinugyanan ug moresulta na unya sa pagpuga sa mga priso.

 Gihimug-atan ni Gullas nga dugang gastuhan sa siyudad ang pagpasud sa mga priso sa ilang pasilidad kay magagikan sa ilang panudlanan ang budget sa ilang pagkaon.

 Mohimo og pakisusi si Mayor Gullas kun tinuod ba nga adunay court order ang pagbutang sa mga priso sa Talisay City Jail. (BANAT NEWS)