Maanad sa signal shutdown
Labing uwahing naigo sa pagpawong sa cell sites ang Iloilo atol sa pagpahigayon sa tinuig nga Dinagyang Festival gahapon ug karong adlawa. Ang signal shutdown gikahadlokan nga mahimo na nga kinaham nga paagi sa kapolisan ug militar pagbadlong sa bisan unsang hulga sa pagpamomba ug terorismo.
May gipadayag na gani nga mga kabalaka, kasagaran hinoon nila pasiaw, nga ipahamtang sab ang signal shutdown atol sa ikaduhang anibersaryo sa Mamasapano massacre karong Miyerkules, Enero 25, Chinese New Year karong Sabado, Enero 28, Valentine’s Day, Semana Santa ug ubang umaabot nga kalihukan nga punsisokan sa daghang tawo.
* * *
Samtang nabag-ohan ang mga Sugbuanon atol sa Piyesta Senyor sa niaging semana ug ang mga Ilonggo karong weekend, pipila ka molupyo sa Mindanao nga naabtan sa signal shutdown dinhi sa Sugbo niingon nga naanad na sila. Usa ka guest sa hotel atol sa Piyesta Senyor niingon nga sa ilang dakbayan sa kasadpang Mindanao naanad na sila nga pawngon ang cell sites matag kadawat sa kapolisan ug militar og mga hulga sa pagpamomba.
Kun maanad ang PNP, AFP, Telcos ug NTC, ug kun dili magkahiusa ang mga konsumidor sa pagkisikisi, mahimong kita nang tanan ang maanad sa signal shutdown sa mosunod nga mga buwan.
* * *
May mga timaan na hinoon nga dili na morekomendar ang lokal nga mga opisyal sa Sugbo og laing signal shutdown sa umaabot nga mga Piyesta Senyor. Si Cebu City Councilor Dave Tumulak niawhag sa kapolisan sa pagmatuod sa ilang katakus pagbaraw sa tanang hulga sa wa’y pag-inutil sa komunikasyon sa katawhan.
Sa iyang bahin, si Mayor Tommy Osmeña mosusi sa shopping malls nga wa pawongi og signal. May subdivisions sab, kasagaran nila nahimutang sa mga ngilit sa Metro Cebu, nga pabiling may signal atol sa shutdown apan dili gihapong ka-text ni katawag sa naapektahan nilang contacts.
* * *
Kun dili papugong ang PNP, AFP, Telcos ug NTC sa panginahanglan sa signal shutdown batok sa seryusong mga hulga sa terorismo, mahitabo ang mosunod nga kausaban:
Mangita ang mga terorista og laing paagi pagpaulbo og mga bomba nga dili na mogamit og cellphones ug cell sites; ug mabanhaw ang beepers, UHF radio ug ubang karaang sistema sa komunikasyon.
- Latest
