Ang pagaw kun mohagawhaw (2)

Dili gayud lalim kun depektuso na kita’g tutonlan. Unsaon, giugtas man nato’g maayo nga gibalewala ang signales sa ginagmay nga kadaot niini. Kanunay na madaot o maguba ang paningog (voice box), ilabi na   ang ubol-ubol (vocal folds) nga maoy moprodyus sa normal nga patingog (sound).

Busa ania ang mga giya 0 mga remedyo aron maseguro nga sa kanunay mohimsog ang atong tutonlan, gawas lang kun dili kini nimo buhaton.

* Apple cider vinegar —Kanang klase nga wala salaa (unfiltered apple), lubog ni tan-awon kaysa laing klase nga tin-aw. Isagol ang 1-2 ka kutsara niini, sa 1ka baso nga tubig-init-init nga igo nga maagwanta sa pag-inom. Buhata ni maka-2 ka beses sa adlaw. Mas maayo 30 mins sa dayong pamahaw ug sa panihapon. Ang ACV, usa kini ka ‘antimicrobial’ nga mosanta batok sa impeksyons.

* Ginger (luy-a) — Mas maayo ang lokal nga klase (gagmayon ni) kun wa, OK lang basta luy-a gitanom sa atong yuta, kay sagad gud sa merkado mga ‘imported’ na. Makapabugnaw ni sa ‘voice box’ sa tutonlan ug mopa-alibyo sa implamasyon, ug sa impeksyon sa baga (respiratory). Puwede mag-ugom-ugom o magsalabat nga butangan og dugos (honey). Mahimo sab kaonon nga presko, nigpison paghiwa-hiwa nga baliburan og asin ug isawsaw sa duga sa lemon. Puwede sab pabukalan kadiyot ang tinadtad nga luy-a ang 1 ka tasa nga tubig sulod 10 mins.

* Honey (dugos) —labing maayo kini nga pangontra o makapahupay sa pagaw. Makapabugnaw sa iritadong tutonlan ug mopahupay sa panakit gumikan sa implamasyon. Moinom niini, 3 ka beses kada adlaw, usa ka kutsara nga dugos nga ‘organic honey, basta hago ang tutonlan. Puwede sab, ang ½ kutsaritang  honey,  wiksan og gamay’ng  blackpepper powder dayon imnon.  Honey g’yuy gamita, kay ang subra kahinam-is sa asukar, hinungdan sab kini sa kadaot sa tutonlan.