Mga anak dili makabaligya sa property kun buhi pa ang inahan

Dear Atty. Divine,

Dunay property ang among inahan sa probinsya. Ang saup ang nag-atiman niini kay ang akong nanay tiguwang na ug dili na makahimo sa pagbiyahe. Tulo mi ka anak ug  pulos sab mi nagtrabaho, hinungdan nga dili gyud mi makaatiman sa maong property. Ang usa nako ka igsuon misugyot nga ibaligya na lang kining maong yuta aron, at least, magamit pa ni nanay ang halin niini sa iyang mga panginahanglan, apan dili man mosugot ang among inahan. Ang akong pangutana kun mahimo ba namo nga ibaligya ang yuta ni nanay nga dili namo siya pahibaw-on? Daghang salamat.-  — Lydia

Dear Lydia,

Kun ang imong nanay maoy tag-iya o registered owner sa maong property, dili kamo makabaligya niini samtang buhi pa ang inyong inahan. Base sa balaod, ang tag-iya sa property mao lang ang makabaligya. Kun dili ninyo makombinser ang inyong nanay sa pagbaligya, mas maayo nga inyo kining respetohan kay posibleng gusto sab niya nga aduna siya'y ikabilin kaninyong mga anak. Apan kun inyong makombinser ang inyong nanay ug  kamong mga anak makakuha og Special Power of Attorney, kon SPA gikan sa inyong inahan, then mahimo ninyong mabaligya ang property. Thanks and God bless! - Atty. Divine

 Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@ yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.