EDITORYAL - Wala ra sila’y kalainan

Andam na ba ang mga Filipino sa pagdagsa sa mga Russians ug Chinese dinhi sa Pilipinas karon nga hinayhinay na nga natuman ang mga plano ni Presidente Duterte nga palig-unon ang relasyon ngadto sa Russia ug China sa tinguha nga makalingkawas kuno sa mga Amerikano?

Daan na man nga maayo ang relasyon sa Pilipinas ug Russia, samtang sa China, maayo man usab ang relasyon niini gawas lang sa isyu sa West Philippine Sea nga karon gusto na lang ni Duterte nga makigbahin sa mga Chinese. Ang gusto lang ni Duterte nga makabaton ang Pilipinas og kagawasan sa foreign policy sa nasud ug ang iyang paagi mao ang pagputol sa relasyon sa Pilipinas ngadto sa Amerika.

Samtang tuod daghang uyon sa gusto sa presidente, apan bisan ang iyang mga kaalyado ug supporters medyo miisa ang kilay sa gipili niyang baylo sa mga Amerikano.

Kining pakigsuod ni Duterte sa maong mga nasud nga namat-an na sa kadaghanan sa mga Filipino nga posibleng mahimo natong kaaway sa umaabot nga panahon, nangahulogan ba nga mao kini ang gusto sa mga Filipino?

Wa man tingali sala ang mga Amerikano kun ngano nga ang foreign policy sa Pilipinas maimpluwensyahan. Sala kini sa nanglabay nga mga lider nga walay baruganan.  Kun kaniadto pa tinud-anay na ug maki-nasud ang atong mga lider, wala untay impluwensya ang mga langyaw. Kun kaniadto wala pa gipangbulsa ang kuwarta alang sa militar, edukasyon, ug mga programa alang sa kabus, dili unta kinahanglan magpakilimos o mamarayeg og hinabang ang Pilipinas sa Amerika ug sa mga kaalyado niining nasud.

Karon, dili na angay nga ikahibulong sa katawhan kining mga panghaylo unya sa Russia ug sa China kang Duterte nga andam nilang ihatag nga wa’y daghang kondisyon. Sinugdanan pa lang kini.

Bag-o pa man, ilubong una nila ang Pilipinas sa utang kabubut-on sama sa gibuhat kaniadto sa ubang mga nasud, mao nga karon maikog na ang mga Filipino pagbalibad kun sila na ang manghangyo.