Feasibility study sa bag-ong BAEX nagkantidad og P52M

CEBU, Philippines - Mipresentar kagahapon sa buntag ngadto kang Gobernador Hilario Davide, III ang AS Enriquez Engineering Consultancy sa draft sa ilang feasibility studies ug desinyo alang sa katukuran sa 12 storey building sa nahimutangan sa karaan nga BAEX building sulod sa compound sa Kapitolyo.

Miabot ngadto sa P52 milyones ang budget alang sa feasibility study sa BAEX building diin ang pagbayad sa maong kantidad anam-anamon. Ubos sa package, ang AS Enriquez maoy mogama sa feasibility studies, desinyo ug sila usab ang mo-manage sa construction.

Gibutyag ni Davide nga upat ka desinyo ang gipresentar ngadto kaniya sa maong engineering consultancy.

Matud sa gobernador nga gipadali niya ang pagpahimo sa desinyo aron mapresentar niya kini ngadto sa hunta probinsiyal. Ug kun maaprobahan kini sa provincial board anha na modesisyon ang gobernador kun ipaubos ba sa Public-Private Partnership (PPP), Build-Operate-Transfer o ang probinsiya ba ang mogasto sa maong proyekto pinaagi sa loan.

Ang maong gikatakdang tukuron nga 12 storey building anha unya ipahiluna ang ubang mga buhatan sa Kapitolyo sama sa command center sa Disaster Risk Reduction Management.

Gitug-an sa gobernador nga wala pay gipresentar ang consultancy sa kinatibuk-ang budget nga gikinahanglan alang sa katukuran sa maong proyekto. Ug buot niya nga mapatuman ang proyekto ubos sa iyang termino.

Kaniadto sa wala pa moigo ang kusog nga linog sa Sugbo, nahimutang sa BAEX building ang Post Office, Civil Service Office, Provincial Information Office, Tourism Office ug Comelec apan human kini maguba sa linog ang Comelec na lang maoy nagpabilin nga buhatan sa likod nga bahin. -/DILT (BANAT NEWS)