2 konbiktado sa human trafficking gipangita

CEBU, Philippines - Nanawagan si Bise Gobernador Agnes Magpale sa publiko nga motabang aron masikop ang laing konbiktado sa human trafficking.

Si Jocelyn Cardona alyas Tiga Jega, 37-anyos, usa sa tulo ka wanted persons kinsa nakonbikto sa kasong kalapasan sa Republic Act 9208 o ang “Trafficking in Persons” nasikop sa ilang balay sa Palanas, Lungsod sa Ronda. Apan ang duha niya ka kauban nga sila si Neopito Dizon alyas Daddy Jun ug Annie Dizon ang padayon pa nga gipangita sa kapolisan.

Si Magpale niawhag sa publiko nga motabang alang sa pagkasikop sa duha ka wanted.

Si Cardona hugtanong nihimakak sa kalambigitan sa mga minor de edad nga giingong ilang gitago sa Greenhouse sa Capitol Site, Dakbayan sa Sugbo ug matag gabii dalhon nila kini sa tulo ka club sa dakbayan isip mga prostitute.

Matud ni Magpale nga si Cardona dunay katungod nga moapelar sa iyang kaso.

Apan sa ilang habig paningkamutan nilang masilutan ang mga nakahimo og kalapasan ilabi na pagpangabuso sa kabataan ug kababayen-an.

Sayo niini ang International Justice Mission nga nakigtinabangay sa kagamhanan sa probinsiya sa pagsumpo sa pagpangabuso sa kabataan ug kababayen-an nibutyag nga gikan sa 2006, niabot na sa 80 ka suspek sa human trafficking ang nakonbikto sa Metro Cebu diin 29 niini niadto lang tuig 2015.

Ang IJM nisuporta sa pagpasaka sa 60 ka kaso ngadto sa korte ug gipanghinaut nga makonbikto ang mga akusado. (BANAT NEWS)