Konseho sa Talisay nakapiso ni Mayor Eddiegul

CEBU, Philippines - Gikasab-an ni Mayor Eduardo Gullas ang konseho sa dakbayan sa Talisay human sila nanghilabot sa iyang trabaho.

Gibutyag sa mayor nga iyang naprangkahan ang konseho sa ilang panagtagbo dihang ilang gihisgutan ang isyu kalabot sa landfill.

Asoy pa niya nga wala siya mahimuot sa gibuhat sa konseho nga niduso kaniya og usa ka pribadong kompaniya nga maoy mopadagan sa ilang labayanan. Iyang gipa-hinumduman ang mga konsehal nga dili kini nila trabaho ug dili siya diktahan ug matud niini nga wala siya manghilabot sa trabaho sa konseho busa dili sab angay hilabtan ang iyang trabaho.

Sa nasayran, nakit-an sa Environmental Management Bureau sa DENR-7 nga aduna’y kalapasan ang landfill sa Talisay nga nahimutang sa Barangay Tapul.

Si Bise Mayor Alan Bucao nangayo og pasaylo kang Gullas human masayri ang hitabo kay wala man kini atol sa maong panagtigum kay nilarga kini sa Japan. Iyang gitataw nga daku ang ilang pagtahod sa mayor, gani iyang gibutyag nga matag lakang nila ila man kining konsultahon. (BANAT NEWS)