Ang mibatok sa simbahan

Sa tibuok kalibutan, nagkadaghan na kuno ang mibulag ug mibatok sa relihiyon. Pasabot nga nag-anam na’g dili ka-relihiyoso ang katawhan. Ang uban, nawad-an na’g pagtuo sa Ginoo.

Hinumdomi nga kapin na sa 2,000 ka tuig ang simbahan ug taliwala sa daghang krisis, nagpabilin kini nga lig-on nga nagbarug gumikan sa pasalig ni Hesukristo nga even the gates of hell, dili makapukan ug dili makabuntog sa simbahan nga iyang gitukod.

Ang nakapabalaka kanato mao nga dinhi sa Pilipinas, pipila na sa atong kaigsoonan, misalmot na pagpanghimaraot, dala ang pagbugalbugal batok sa atong kaparian ug kadagkoan sa simbahan.

Apan sama sa pagdawat ni Hesukristo sa mga pagsaway ug pagpasakit nga gipahamtang batok kaniya sa katawhan nga buot niyang luwason, nagpabilin nga wala matarog ang simbahan dinhi sa atong nasud.

Si Archbishop Socrates Villegas sa Lingayen-Dagupan ug presidente sa Catholic Bishops Conference of the Philippines (CBCP), nagkanayon, isip tubag sa mga pangatake batok sa simbahan: “I pray for those who see us as enemies. Mine is the silence of respect for those who consider us their enemies. Mine is the silence of Jesus before the arrogance of Pilate.”

Tinuod, ang gibarugan karon sa simbahan batok sa mga nakig-away niini mao ang pagpakahilom batok sa mga pagpanghimaraot sa mga modernong Pilato nga nag-alirong kanato karon.

Ang kasaysayan nagpakita sa daghang paningkamot sa dagko ug gamhanan nga mga lider kanhi sa tibuok kalibutan pagbuntog sa simbahan. Sa iyang lindog, si Elinando B. Cinco, nagkanayon:  “The 2,000-year-old history of the Catholic Church is replete with all kinds of warriors and heads of state who crossed sword with the institution. From Hitler and Stalin, to Fidel Castro and Evo Morales, to name just four of them in the recent past.”

Upat lang ka tawo ang gihinganlan dinhi, apan, gamhanan kaayo ug bangis ang maong mga lider. Kinsa ang wa makaila nila ni Hitler ug Stalin? Kontra kaayo nila ang simbahan, apan, sila ang napukan ug nagpabilin ang simbahan.

Ato ni nga gihisgutan tungod kay dinhi usab sa atong nasud, mao ra og adunay mga paningkamot, somewhere, nga pagdaot sa simbahan. Open na kaayo sila nga manghimaraot sa simbahan. Kun napakyas sila si Hitler ug Stalin sa ilang pagkagamhanan, magmalampuson kaha ang uban natong kaigsoonan karon paghugno sa simbahan?

Ug kinsa ang nagsulti niini … “And now I say to you: You are Peter and on this rock I will build my Church, and never will the powers of death overcome it.”