Nakakwarta gumikan sa istriktong pagpatuman sa trapiko
CEBU, Philippines - Niabot sa tunga sa milyon ka pesos ang nakwarta sa kagamhanan sa siyudad sa Talisay gumikan sa ilang hugot nga pagpatuman sa lagda sa trapiko sud sa pipila ka adlaw.
Ang City of Talisay-Traffic Operation Development Authority (CT-TODA) nagsugod sa pagpanakop sa mga traysikol, traysikad ug mga racal nga pataka lang og sulod sa karsada ug uban pang traffic violations.
Si Hiram Benatiro, pangulo sa CT-TODA nibutyag nga kasagaran sa ilang madakpan mao kadtong wala maka-renew sa ilang franchise hinungdan nga kun kini molukat sa ilang sakyanan, kinahanglan gyud nga kumpletohon ang pagkuha og dokumento.
Base sa ilang talaan, 19 ka traysikad lang ang narehistro apan dos mil ang nagdagan; samtang 1,407 ka traysikol ang gilukatan og franchise.
Tungod niini, niabot sa P633, 150 mil ang nakolekta gikan sa pagkuha og franchise samtang P16, 800 ang nakolekta gikan sa drayber nga aduna’y kalapasan.
Si Benatiro nagkanayon nga nimenus ang mga badlungong drayber sa kadalanan ug mao sab ang nakatabang sa paglugak sa trapiko. Asoy pa niya nga nakahatag og maayong resulta ang ilang hugot nga pagpatuman sa lagda sa trapiko. (BANAT NEWS)
- Latest
