Gobiyerno ang tag-iya sa yuta nga giabangan

Dear Atty. Divine:

Aduna koy pangutana labot sa giabangan nga pwesto nga tindahan sa akong ginikanan sud na sa lima ka tuig kapin. Niadto ra untang August mi papahawaun. Nihangyo ang akong mga ginikanan nga magpa-extend mi og 1 year hangtud nga maka-graduate ko sa college karung March. Dili gyud mosugot ang tag-iya kay papahawaon na gyud mi. Karong bag-o lang nakahibalo mi nga yuta pa diay sa Kapitolyo or province lot ang among giabangan mao nga wala gyud mi mopahawa. Apan sige na og text ang tag-iya nga naa sa gawas nga usa ka Canadian citizen. Sa month of September ang nikuha sa abang kay iyahang mama nga naay balay tapad sa tindahan nga among giabangan.  Karong bag-o mi-text siya nga ipapulis daw niya akong ginikanan ug magbuhat daw sila og legal action. Ang akong pangutana aduna ba siyay katungod nga mopapahawa namo nga gobiyerno man ang tag-iya sa yuta? Pwede ba sila makapanag-iya nga Canadian citizen man siya? Daghang salamat. -- Lina

* * *

Dear Lina:

Sa akong nasabtan sa imong asoy nga ang tindahan gipanag-iya sa inyong giabangan apan ang yuta gipanag-iya sa Kapitolyo. Posible nga aduna lang siyay rights nga mo-okupar niini base sa Ordinance 93-1  apan kun wa sab niya mabayri ang Kapitolyo ug wa na siya mag-okupar sa maong yuta kay atoa na siya magpuyo sa Canada ug gani dili na siya Filipino Citizen mamahimo nga inyo kanang subayon sa Kapitolyo ug sultian sila sa matuod. Basi sa balaod ang foreigner dili makapanag-iya og real property or yuta dinhi sa Pilipinas apan kun kanhi Filipino Citizen siya mamahimo gihapong makapanag-iya og yuta apan adunay limit ang gidak-on niini. Kun ugaling mopadayon siya sa pag-harass sa imong mama then mamahimo ninyo siya nga ireklamo sa barangay o ipa-blotter. Kun aduna moy proof nga dili siya ang tag-iya sa yuta ug wa siya makabayad niini then inyo kanang ipangutana sa Kapitolyo kun unsay inyong buhaton aron inyong ma-assume ang maong rights kay atoa na man sa Canada ang kanhi occupant niini. In the meantime, ayaw lang gyud mo pagpahawa gawas lang kun aduna nay mando sa korte. Thanks and God bless! -- Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] og akong tubagon ang inyong pangutana pinaagi sa akong column matag Miyerkules, Sabado og Domingo.