2 ‘drug pushers’ patay sa polis

CEBU, Philippines - Duha ka gipasanginlang drug pushers ang napatay sa managlahing operasyon sa kapolisan  sa Dakbayan sa Danao ug Lungsod sa Compostela.

Sa Brgy.Bato sa Danao,  napatay sa kapolisan ang gidudahang drug pusher nga si Benedicto Cane Jr., human gikatahong namusil sa kapolisan sa Danao kauban sa mga sakop sa Police Intelligence Branch sa Cebu Provincial Police Office nga modakop unta kaniya.

Samtang kauban niini nga babaye nga si Estela Marie Paran ang nadakpan ug nakuhaan  kini og duha ka dagkong putos sa pinaugang marijuana. Nakuha usab sa crime scene ang usa ka .38 rebolber nga gituohang maoy gigamit ni Cane sa pagpusil sa mga polis.

Samtang sa Brgy. Magay sa Lungsod sa Compostela  napatay ang usa ka Teofilo Cababan nga taga Dakbayan sa Danao apan nag-abang og balay sa maong dapit, samtang nakaikyas ang mga sakop niini nga nailhan lang sa mga alyas nga Bunso ug RR.

Matud pa ni Police Officer 3 Michael Magallon, Desk Officer sa Compostela Police Station, nagpahigayon sila og buy-bust operation  batok ni Cababan.

Apan nakabantay kini ug gipamusil ang mga polis apan wala makaigo hinungdan nga kini nabawsan ug napatay.

Nakuha kaniya ang usa ka medium size, tulo ka gagmay nga pakete ug usa ka kalibre .45 pistola, ug P250. Romeo Limpangog ug Rowena Capistrano (BANAT NEWS)