Towing ni JVR gikwestiyon

CEBU, Philippines - Gipatubag sa Ombudsman ang kagamhanan sa Dakbayan sa Talisay labot sa ilegal nga Memorandum of Agreement (MOA) sa niaging administrasyon tali sa A-Plus Towing Company.

Si Atty. Giovanni Sususco, city legal officer, nibutyag nga andam sila nga motubag niini apan ang adunay tulubagon mao ang administrasyon ni kanhi mayor Johnny de los Reyes.

Giingong ang maong MOA walay pagtugot sa konseho.

Sa ilang kasabutan, ang siyudad adunay bahin nga singko  porsiyento sa ilang kita sa maguyod nga sakyanan nga pataka lang og parking.

Apan usa sa mga nadakpan ang nidangop sa Ombudsman ug gusto kining mangayo og refund sa iyang nabayad dihang gidakop ang iyang sakyanan ug iyang nahibaw-an nga dunay depekto sa kasabutan.

Si Sususco nitug-an nga nihimo na og fact-finding ang buhatan sa Ombudsman ug nangayo kini og dokumento.

Apan iyang giklaro nga wala siyay mahatag tungod kay wala pa man nila nakit-i ang kopya sa MOA.

Samtang si City Treasurer Emma Macuto nagkanayon nga dili siya makahatag og refund sa nireklamo tungod kay wala man siyay nadawat nga kwarta.

Iyang gipasabot nga adunay tseke nga niabot sa iyang buhatan nga giingong gikan sa A-Plus apan wala niya kini gidawat tungod kay wala may mga papeles nga nagsuporta sa pagsulod sa tseke sa panudlanan sa gobiyerno.

Iyang nahinumduman nga gikan ni Konsehal Valeriano Ylanan ang tseke kinsa mao pa ang chairman sa City of Talisay-Traffic Operation Development Authority (CT-TODA) kaniadto.

Si Ylanan sa iyang bahin niingon nga iyang gihatag ni Pastor Paypa ang tseke nga kantidad og P3 mil kapin. Gipakita ni Ylanan sa mga tigbalita ang ilang received copy sa pag-turnover sa tseke niadtong Marso 3 niining tuiga.

Dugang ni Sususco nga kung adunay basehan sa gihimong fact-finding sa Ombudsman hayan mapadayon gyud ang kaso ug si JVR ang manubag niini. (BANAT NEWS)