EDITORIAL - Respeto lang

Daghan ang naglibog sa gitaak nga direksyon ni Pres. Duterte ilabi na sa iyang taras ngadto sa Amerika, European Union, United Nations ug bisan na gani sa Simbahan. Apan wala nila kaayo matutoki kun unsay mamahimong benepisyo unya sa nasud karon nga gibuksan niya ang laing pamaagi sa Pilipinas sa diplomasya ngadto sa international community.

Sa unang 100 diyas ni Duterte sa pagkapangulo sa nasud duha maoy naigo sa iyang kampanya batok sa illegal nga drugas. Ang problema sa lokal ug epekto niini sa internasyonal nga ruweda. Dinhi sa lokal, daghang na-neutralized nga mga sindikato sa illegal drugs ug nakaingon usab sa pagkubos sa crime rate sa nasud.

Matud pa niya, ang illegal drugs maoy dakong hulga sa kaugmaon sa mosunod nga mga henerasyon sa Pilipinas.

Ang iyang gibuhat nakaapektar usab sa international scene. Daw nasayod na siyang daan nga mokisikisi  gyud ang Amerika ug karon niapil na ang European Union hasta ang Simbahan ug uban pa.

Ug tungod niini nakahigayon si Duterte nga kausahon pagpalayas kining impluwensya sa mga langyaw nga pirmeng manghilabot sa mga palisiya ug mga desisyon sa Pilipinas sud na sa dugay nga panahon. Nilampos si Duterte nga ipakita sa kalibotan nga dili ‘itoy-itoy’ ang mga Pilipino ni bisan kinsang nasud ug dili kini mahadlok nga mawad-an og mga donasyon gikan kanila.

Kun buot tan-awon respeto lang sa ubang nasud ang giapas ni Duterte para sa mga Pilipino. Gikan sa maong posisyon, gusto niya nga ibase ang mga independenteng palisiya sa Pilipinas sa pakiglambigit niini sa uban.

Inutok usab kini, kay dili na makonsiderar ang Pilipinas nga “politically o militarily-aligned” ni bisan kinsang grupo o nasud. Tungod niini gamay kaayo ang tsansa nga mabira sa giyera ang Pilipinas kun magkagubot gyud ang US, China, Russia ug uban pa. Apan tungod usab sa maong posisyon, kinahanglang palig-unon ni Duterte ang Pilipinas aron barugan ug panalipdan ang kaugalingon bisan walay ayuda sa ubang mga nasud.