Lalaki gitabangan og kulata, gidunggab pa gyud
CEBU, Philippines - Anaa sa kritikal nga kahimtang ang usa ka lalaki kinsa gikan nakig-inom human kini tabangi og kulata ug dunggaba sa grupo sa wala mailhing mga tawo pasado alas 9 sa niaging gabii.
Matud ni PO1 Glenn Bordabla sa Presinto 3 sa Mandaue City Police Office nga ang biktima mao si Jovel Dionaldo, 18 anyos, nagtrabaho sa usa ka establisamento sa Barangay Pagsabungan sa nahigustang dakbayan.
Asoy sa polis nga samtang naglakaw aron mopauli sa iyang gipuy-an sa Barangay Canduman ang biktima, gisundan kini sa grupo sa mga lalaki ug gitabangan sa pagkulata. Nakahigayon pa unta sa pagdagan ang biktima apan naabot kini sa lugar nga wala na siya’y kaagian. Hinungdan nga ang usa sa mga lalaki kinsa nagdala og kutsilyo ang nidunggab sa tuong bahin sa ilok sa biktima dayon dagan.
Ang mga sakop sa Emergency Rescue Unit Foundation (ERUF) ang nitabang sa biktima ug ila kining gidala sa Mandaue City Hospital apan kay kritikal man ang kahimtang niini, dali kining gibalhin sa Vicente Sotto Memorial Medical Center sa Dakbayan sa Sugbo. (BANAT NEWS)
- Latest
