Makina sa sakyanan sa CT-TODA giilisan

CEBU, Philippines - Gitug-an sa pangulo sa City of Talisay-Traffic Operation Development Authority (CT-TODA) nga usa sa ilang sakyanan ang wala na niya gigamit.

Kini human iyang nasayran nga wala kini narehistro tungod kay dili na mao ang makina niini.

Gipasabot ni Hiram Benatiro, mao ang Toyota nga sakyanan diin ang makina iya sa Kia.

Matud niya nga human siya nasayud niini, wala na niya gigamit ang sakyanan sa kabalaka nga maunsa ang sakyanan diha sa kadalanan.

“Salikwaot kaayo paminawon nga kami ang mo-implementar sa balaud sa kadalanan pero kami na hinoon ang mag-una-una sa pagpabadlong,” nagkanayon si Benatiro.

Apan ang mekaniko sa siyudad nitataw nga wala na siya masayud sa makina sa Toyota ug siya gianugnan sa kaha niini hinungdan nga iyang gikuha ang makina sa Kia ug iyang gitaud.

Gani napuslan pa man kini sa pipila ka buwan apan naguba na sab tungod kay bisan kinsa naman lang nga drayber ang mogamit niini sa niaging administrasyon.

Si Benatiro wala na sab niayo sa sakyanan tungod kay dili man gihapon nila kini marehistro.

Hinuon siya nirekomendar nga mopalit na lang og surplus nga makina sa Toyota aron masubay ang sakyanan sa saktong dokumento. (BANAT NEWS)