Katropa, Gin Kings ilog sa no. 1 spot

CEBU, Philippines - Eksplosibo ug kulbahinam nga sangka ang mosira sa elimination round sa PBA Governors’ Cup tungod sa panag-abot karon sa duha ka title contender,  TNT KaTropa ug Barangay Ginebra San Miguel nga mag-ilog sa  No. 1 seed karong gabii didto sa Alonte Sports Center.

Ang KaTropa ug Ginebra magharong sa alas-6:45 sa gabii human sa sangka tali sa San Miguel Beermen ug natagak na nga Blackwater Elite sa alas-4:30.

Ang TNT kasamtangang anaa sa kinatas-an sa standing sa ilang 9-1 nga baraha, apan ang Ginebra (8-2) tinguha nga moilog sa ilang puwesto aron  makuha ang dakung kompiyansa paingon sa playoffs.

Ang TNT ug Ginebra pulos na hinuon magbaton og twice-to-beat advantage sa playoffs.

Ang modaog tali sa TNT ug Ginebra maoy makigharong sa Rain or Shine Elasto Painters o Phoenix Fuel Masters nga moagi pa og “do-or-die” match alang sa katapusang luna sa quarterfinals karong  Miyerkules.

Ang KaTropa gusto nga makandado ilang kupot sa No. 1 aron  malikayan nila nga makasangka ang mas delikado ug igsuon nilang koponan nga NLEX Road Warriors nga anaa sa ikapitong dapit.

Dakung hagit sa Ginebra nga modaog batok sa KaTropa nga maoy giisip nga labing lig-ong koponan karon nga conference tungod sa presensiya sa duha ka kasaligang import nga sila si Mychal Ammons ug Michael Madanly, apan mas bantayanan nila ang mga local gunners sa TNT nga sila si Jayson Castro, Troy Rosario ug Ranidel De Ocampo. (BANAT PALARO)