Puhagon na ang Abu

Liboan ka mga sundalo ang misuhid karon sa Sulu ug Basilan niining nagkainit nga kampanya sa kagamhanan batok sa bandidong Abu Sayyaf. Kini agi sa mando ni Presidente Rodrigo Duterte nga puhagon na ang maong teroristang grupo nga hagbay rang nanghasi sa Mindanao.

Sulod na sa pipila ka semana ang gipakusgan nga kampanya batok sa Abu Sayyaf. Ug sa mga operasyon sa militar, pipila ka engkwentro batok sa maong mga bandido ang miulbo nga mipatay na og daghang mga sundalo.

Niining sitwasyon sa Mindanao karon, dako og papel ang Abu Sayyaf sa pagkagusbat sa kalinaw ug kahusay sa maong rehiyon. Hagbay rang nagtanum og kaguliyang ang maong grupo apan hangtud karon wala pa gihapon kini mapuhag.

Pipila na ka nangaging administrasyon apan pabiling nagbahis ang Abu Sayyaf didto sa Mindanao. Usahay lisod sabton nga sa ka superior sa atong Armadong Kusog, padayon gihapon nga nagbarog ang maong grupo ug sigeng pangidnap sa mga inosenteng sibilyan.

Hinuon matud pa sa pipila nga tungod lagi kay anad nang mopasikotsikot ang maong mga bandido sa kabukiran didto sa Sulu ug Basilan mao nang maglisod gayud ang puwersa sa militar paggukod kanila. Hinuon, sa laing bahin, insakto usab kana.

Apan dili usab kana ang hinungdan ngano nga dili na gayud mapuhag ang maong mga terorista. Sa ako nang gikaingon nga sa ka superior sa militar kun ang mga armas ug training maoy hisgotan, dili ko motuo nga dili na gayud mapulbos ang Abu Sayyaf. Insakto kining gibuhat sa kagamhanan nga all-out war batok sa maong grupo. Kini aron gayud nga sa katapusan mapapas na ang maong mga bandido. Ug atong nakita nga sinsiro gayud ang Duterte administration nga molampos ang maong kampanya.

Apan ang kalampusan sa maong kampanya mag-agad usab sa partisipasyon sa mga lokal nga kagamhanan didto sa Sulu ug Basilan. Dili paigo ang armadong pag-arangkada sa administrasyon. Kinahanglan moduyog  usab ang mga local government units didto kinsa nasayod asa nagluklok ang mga bandido sa ilang lugar.