Metro Cebu labing trapik

CEBU, Philippines - Nituo si Cebu City Mayor Tomas Osmeña sa survey sa Waze Driver Satisfaction Index 2016 nga nagbutyag nga ang Metro Cebu maoy labing ngil-ad sa dagan sa trapiko lukop kalibutan.

Ang score nga 10 nagpasabot nga “satisfying” ug ang score nga 1 nagpasabot nga “miserable” ug ang Metro Cebu nakakuha og 1.15 Driver’s Satisfaction Index.

Matud ni Osmeña nga kung wala lang unta babagi sa administrasyon ni kanhi mayor Michael Rama ang tinguha niini nga pagtukod og mga flyovers hayan nakatabang kini aron maminusan ang problema sa trapiko sa Metro Cebu.

Sigun niini nga 16 ka flyovers ang gusto unta niining itukod sa Dakbayan sa Sugbo apan wala kini mahinayon tungod kay daghan ang nisupak.

Dugang sa mayor nga dili na mahimong motukod og flyover karon sanglit mas makadugang lang kini sa grabeng kahuot sa dagan sa trapiko tungod usab kay dunay mga dalan nga kinahanglang sirad-an.

Gihulagway niini nga maong nagkagrabe ang problema sa trapiko gumikan kay walay saktong pagpatuman sa lagda sa trapiko ug  daghan usab nga mga establisemento ang walay saktong parking area maong ang mga sakyanan sa ilang mga customers anha i-park daplin sa karsada.

“What are the solutions, one we have to stop growth, we have to be very strict in requiring more parking lots for new constructions and for condominiums, we have to also tighten our traffic situation, we have to adjust changing realities,” matud ni Osmeña.  (BANAT NEWS)