Doctors, nurses sa RHUs dawaton sa Kapitolyo
CEBU, Philippines - Makabenepisyo ang Probinsiya sa Sugbo sa laraw sa Department of Health nga minusan ang mga doktor ug nurses sa mga Rural Health Units sunod tuig.
Kini ang gipadayag ni Gobernador Hilario Davide III kinsa nagkanayon nga kung mahawa sa mga RHUs ang mga medical personnel, mahimong i-hire kini sa kagamhanan sa probinsya aron motrabaho sa mga provincial ug district hospitals.
“Kun mag-reduce sila, we can accommodate them, we would be happy to take them in provided mo-apply sila. Makapili ta maayong doctors from them,” matud ni Davide. Ang probinsya sa Sugbo niangkon nga kuwang sila og mga doktor ug nurses sa mga tambalanan nga gidumala sa probinsya ug malipay si Davide kung adto mo-apply ang mga nurses ug doktor nga mahawa sa mga RHUs.
Ang Provincial Health Office nagkanayon nga posibleng maapektuhan sa plano sa DOH ang kapin 600 ka nurses nga anaa sa mga RHUs sa probinsya.
Matud ni Davide nga kung makuhaan man ang RHUs andam usab ang probinsya nga mo-complement ug mopadala og mga doctors ug nurses alang sa mga special assignment sa mga lungsod nga kuwang ug nanginahanglan og doktor. Base sa giduso nga budget sa DOH alang sa 2017, kuhaan hangtud sa katunga sa gidaghanon ang mga doktor ug nurses sa mga RHUs. (BANAT NEWS)
- Latest
