GlobalPort daog sa Blackwater

CEBU, Philippines - Bisan og wala na sila’y  paglaum nga makasud pa sa playoffs, ang GlobalPort Batang Pier mipakita gihapon sa ilang kabangis sa panamilit nilang duwa sa PBA Governors’ Cup.

Ang Batang Pier milubong sa Blackwater Elite sa iskor nga 139-126 sa ilang duwa kagabii didto sa Ynares Center.

Si Joseph Yeo mipabuto og 37 puntos, 22 niini iyang nahimo sa first half alang sa Batang Pier nga mitapos sa conference uban ang 4-7 win-loss record.

Ang import nga si Mike Glover mirehistro og double-double pinaagi sa iyang 34 puntos ug 18 ka rebounds, samtang si Terrence Romeo mitapos sa duwa nga adunay 28 puntos.

Inay magluya, ang GlobalPort ganado nga miduwa diin mipaarak sila og mga puntos alang sa 48-36 nga labaw sa halftime, Mibawos  usab og ataki ang Blackwater sa pagpangulo ni rookie Roi Sumang, apan wala sila katupong sa kaagresibo   sa GlobalPort.

Si Keala King maoy mibida sa Elite sa iyang 28 puntos ug 15 ka rebounds, samtang si Sumang adunay 22 puntos.

Ang Elite nga daan nang natagak sa elimination sa ilang 1-9 nga baraha aduna pa’y nahabiling usa ka duwa batok sa defending champion San Miguel Beermen. (BANAT NEWS)