Casimero pabiling kampiyon

CEBU, Philippines - Milampos ang Pinoy’ng boksidor nga si Johnreil ‘Cuardo Alas’ Casimero  pagdepensa sa iyang IBF flyweight title human gipatikangkang sa ika-10 nga hugna ang kanhi wa’y pilde niyang Briton challenger nga si Charlie Edwards sayo sa buntag kagahapon didto sa O2 Arena sa London, England.

Segun sa taho ni Dong Secuya sa Philboxing.com, dominante kaayo si Casimero tibuok away diin pipila ka higayon iyang gitay-og  si  Edwards ginamit ang solido niyang mga suntok ug hait nga kombinasyon batok sa Briton nga nagpunay na lang og kupot.

Natapos ang  away sa oras nga 1:57 sa ika-10 nga hugna human si Casimero mipatugpa og makabungog nga left hook sa apapangig nga maoy nakapasukarap ni Edwards.

Nakabarog pa si Edwards, apan  tataw kaayong nagkalipong-lipong hinungdan nga giundang ni reperi Steve Gray ang away sa dihang miaksiyon unta si Casimero og lusad og  laing ataki.

Si Casimero nga usa sa two-division world champion nga kanunay mosalida sa teritoryo sa iyang kontra, miinat sa iyang rekord ngadto sa 23-3 nga gipalamanan na karon og 15KOs, samtang si Edwards nakatilaw sa una niyang pilde sa siyam ka duwa uban ang 3KOs.

Sa kadaugan ni Casimero, nagpabilin gihapon nga upat ang reigning Pinoy world boxing champion nga naglangkob  nilang Nonito ‘The Filipino Flash’ Donaire Jr. (WBO super bantamweight), Marlon ‘The Nightmare’ Tapales (WBO bantamweight) ug Jerwin Ancajas (IBF super flyweight). (BANAT PALARO)