Way lisensiya, may shabu, laing 2 sikop

CEBU, Philippines - Nadakpan sa checkpoint sa may Hill Top, Casili, Lungsod sa Consolacion alas 9 pasado sa niaging gabii ang nagmaneho sa motor nga walay lisensiya apan ang angkas niini ang nakuhaan og shabu.

Si Police Officer 1 Raymond Lleve sa Consolacion Police Station niila sa nadakpan nga sila si Ruthes Bacumador Cortes, 29, ug Laurence dela Calzada, 26, taga Barangay Jugan.

Matud ni Lleve nga si Cortes walay lisensiya hinungdan nga ilang girekisa ug si dela Calzada ilang nakuhaan og usa ka gamay nga pakete sa gituohang shabu hinungdan nga ang duha ilang gidakop.

Samtang gidudahang pusher nga wala motahan sa Oplan Tukhang ang nadakpan sa buy-bust operation sa Sitio Curva, Yati, Lungsod sa Liloan alas 10 pasado sa niaging gabii.

Si Senior Police Officer 2 Arnel Maglinte sa Liloan Police Station niila sa nadakpan nga si Opeliones Tojong Mina, 40, nagpuyo sa maong dapit kinsa nakuhaan og lima ka gagmay nga pakete sa shabu kauban sa P200 nga buy-bust money.

Matud ni Maglinte nga nakadawat sila og taho sa nagpadayon nga ilegal nga kalihukan sa suspek nga maoy nakaaghat kanila sa pagpahigayon og buy-bust operation nga niresulta sa pagkasikop niini.

Sa pikas bahin, nagtingkagol sa karsel ang tigpayuhot og ilegal nga drugas dihang gihimo ang buy-bust operation sa Corazon Village, Isla Verde, San Isidro, Dakbayan sa Talisay kagahapon sa kadlawon.

Ang dinakpan nailhan nga si Esmeraldo Abangan alyas Esmer, 29-anyos, minyo nga nagpuyo sa nahisgutang lugar.

Ang kapolisan ang nakadawat og tawag ug nipahibawo sa ilegal nga kalihukan sa suspek hinungdan nga ilang gisusi.

Gihimo ang buy-bust operation hinungdan sa pagkasikop sa suspek kinsa nakuhaan og ilegal nga drugas ug usa ka .45 kalibre sa armas nga adunay pito ka bala.

Gidala sa Talisay City Police Station ang suspek dayon gibalhug sa bilangguan samtang nagpaabot nga pasakaan og kaso. (BANAT NEWS)