Sugbo Zika virus-free

CEBU, Philippines - Nagpabilin nga Zika virus-free ang Sugbo apan alerto kanunay ang Department of Health.

Ang DOH unang nakatala og Zika virus sa Visayas niadtong tuig 2012 diin usa ka 12-anyos ang nataptan gikan sa Negros Oriental ug ang ikaduhang kompir-madong kaso ang 45-anyos nga babaye gikan sa Iloilo.

Ang duha parehong wala nakaadto sa gawas sa nasud hinungdan nga gituohan nga nakuha lang kini sa lokal gikan sa pinaakan sa lamok.

Matud ni Dr. Van Phillip Baton, medical officer sa DOH-7, nga ang timailhan sa mataptan sa virus mao ang hilanat, pula ang mata ug panakit sa lutahan.

Dili makamatay ang Zika virus apan delikado ngadto sa mga babayeng nagsabak tungod kay makamugna kini og neurologic defect sa bata nga ihimugso.

Dugang pa ni Baton nga ang lalaki nga adunay Zika virus mahimo usab nga makatakod kung makighilawas sa babaye.

Gitug-an ni Baton nga dili ang Zika maoy tinubdan sa kamatayon sa tawo kung dili ang ubang komplikasyon sa sakit.

Wala pay tambal ug bakuna alang sa sakit maong gikinahanglan ang pagmatngon ug pagpanglimpyo aron walay kapuy-an ang mga lamok nga magdala sa maong sakit.

Samtang ang Vicente Sotto Memorial Medical Center pinaagi sa pangulo niini nga si Dr. Gerardo Aquino nitug-an nga andam sila kanunay sa higayon nga adunay pasyente nga mataptan sa Zika virus.

Sumala pa ni Aquino nga kompleto sila sa facility ug kahimanan lakip ang pag-detect sa kagaw nga dili na kinahanglan nga moadto pa sa kauluhan.

Gitug-an ni Aquino nga nagamit na nila ang maong facility sa mga nanglabay nila nga pagpangandam sama sa Sars, Mers-Cov ug uban pa. (BANAT NEWS)