Gitulis, duha gilugos

CEBU, Philippines - Gitulis sa duha  ka armadong lalaki ang usa ka larangan sa dalan National Highway, Barangay Pitogo, Lungsod sa Consolacion alas 3 pasado ang takna sa miaging kaadlawon ug gidagit pa gyud ang duha  ka katabang nga babaye ug gilugos ngadto sa usa ka sam-ang sa Brgy. Tayud.

Si Police Officer 1 Cresenciano Saladaga sa Consolacion Police Station miingon nga alas 4 pasado na ang takna sa kaadlawon nga nahidangat sa ilang buhatan ang tag-iya nga si Ric Montebon Saladaga, 43, ug misumbong kabahin sa nahitabo.

Ang duha ka katabang nga nag-edad og 34 anyos ug 37 anyos nga gibiyaan sa mga tulisan diha sa sam-ang human silang duha gilugos.

Ang duha ka wala hiilhing mga lalaki gibana-bana nga 30 kapin ang panuigon ug kasarangan lamang ang pamarog ug gidak-on sa ilang lawas.

Matud pa nagpakaaron-ingnon nga mga customer ang duha apan pagduol sa may kahera kalit silang miibot og armas dayong deklarar nga tulis ug pugsanong gikuha ang halin nga kapin sa P3 mil. Wa pa gyud matagbaw ang duha, pugsanon nilang gidagit ang duha ka katabang ug gipugos pagpaangkas sa motor nga ilang gipatung-an ug ang naa sa likod nagtion og armas sa mga babaye.

Ang team sa kapolisan sa maong lungsod nga gipangulohan ni Police Officer 3 Mamerod Aracena ug mga kauban ug kuyog sa tag-iya sa larangan milibot sa lungsod hangtud naabot sila sa sam-ang sa Tayud.

Didto ilang naabtan ang duha nga naghilak apan wala na diha ang mga tulisan. Ang mga babaye misumbong nga gilugos sila sa duha.

Sa wala pa ang maong pagpanulis, gitulis usab sa tulo ka armadong lalaki nga nagmotor ang usa ka beach resort sa Brgy. Estaca sa silingang lungod diha sa Compostela.

Si Non Uniform Personnel  Amedel Mollena sa Compostela Police Station miila sa kahera sa G and M Beach Resort nga gitulis nga si Cristina Arnado, 56.

Matud pa ni Mollena base sa imbestigasyon tulo ka wala mailhing lalaking nagmotor ug nagpatuo nga kustomer ang nangabot ug nition kanila og armas dungan ang pagdeklarar nga tulis. Gikuha sa mga tulisan ang P6 mil nga salapi,singsing, cellphone nga nagkantidad og P6,000, napulo ka kaha nga sigarilyo, pitaka sa biktima nga adunay sulod nga P200, ug uban pa nga mahinungdanong mga butang niini.

Human niini gigapos ang biktima ug nagdali kini sa pagsibat pahilayo sa maong dapit nga sakay sa ilang motorsiklo. Alas-6 sa buntag na gipahibalo sa staff sa maong resort ang insidente didto sa kapolisan. (BANAT NEWS)