Hununga na ang prank calls – Tumulak

CEBU, Philippines - Nanawagan si Konsehal Dave Tumulak, ang chairman sa Committee on Peace and Order ngadto sa publiko nga dili magbinuang kun manawag sa Command Control Center ug sa kapolisan ilabi na kun adunay kalabutan sa hulga sa pagpamomba kay makamugna kini og kabalaka sa katawhan.

Sa miaging adlaw, naukay ang mga tawo sa mikatap nga text scare lakip na ang mga post sa social media labot sa impormasyon nga matud pa ang Sugbo maoy sunod nga target sa pagpamomba nga dali ra usab nga giklaro sa tinugyanan sa balaod nga walay kamatuoran.

Apan laing kabuang ang gihimo sa mga tawo nga walay lingaw ug kini mao ang paghimo og prank calls sa Command Control Center sa kapolisan. Matud ni Tumulak nga kagahapon sa kadlawon nakadawat og tawag ang Command Control Center ug kapolisan nga adunay kadudahang bag nga gibilin sa Fuente Osmeña Circle apan dihang giadto, walay nakita ang mga mirepondeng polis. Laing prank call ang ilang nadawat kagahapon sa buntag diin matud sa nanawag nga adunay kadudahang box sa Cebu City Sports Complex apan dihang gisuta dili gihapon kini tinuod.

Tungod niini, nanghinaot si Tumulak nga mahunong na ang prank calls kay dili lalim ang pagresponde niini.

Samtang alang sa dugang seguridad, ang kadagkuan sa Cebu South Bus Terminal dili na motugot pa nga adunay ipangbilin nga bagahe sa sulod sa terminal. Si Joey Herrera ang pangulo sa CSBT niingon nga mipatuman sila karon og istrikto nga polisiya sa terminal.

Ang mga security guards, mopahigayon og roving sa sulod sa terminal ug kun adunay makit-ang bag nga ibilin, susihon kini ug i-report. Lakip nga giawhag ni Herrera ang mga tenants nga dili tugtan ang bisa’g kinsa nga magbilin og bagahe.

Gipahimangnuan usab niya ang mga pasahero ug ang tanang mosulod sa terminal nga dili ibilin ang ilang mga butang bisa’g asa ug motaho sab kun adunay kadudahan nga tawo o butang sa terminal.

Nangayo si Herrera og pasensiya sa mga pasahero kun kini mahasol sa ilang gipatuman nga hugot nga inspeksyon. (BANAT NEWS)