“Text scare” di angay tuohan

CEBU, Philippines - Ang kapolisan ug militar mipasidaan sa katawhan nga dili mabalaka ug dili motuo dayon nianang mga nikatap karong mga text messages ug mga posts diha sa social networking sites kabahin sa mga mahitabong sunod nga pagpamomba sama sa nahitabo didto sa Davao City sa miaging adlaw nga Biyernes.

Ang direktor sa Police Regional Office-7 , Chief Supt. Noli Taliño miingon nga  hasta siya nakadawat sa maong mga walay kamatuorang mensahe maong nanawagan siya sa publiko nga magpabiling kalmado ug dili motuo nianang mga mensahe nga pagpanghadlok.

Tinabangay

Wala hinuon ilimod ni Taliño nga aduna gyud kanunay hulga sa terorismo bisan asa pa nga dapit, bisan ang mga dagko ug adunahang mga nasud nakasuway usab niini. “Lahat ng lugar…highly urbanized cities ay pwede maging biktima ng terrorists.  Hindi lang sa Philippines but other countries also… walang ligtas dito. Dapat tayo magtulongtulong,” saysay pa ni Taliño.

Adunay nikatap nga text messages kabahin sa giingong planong pag-atake sa mga terorista dinhi sa Sugbo ilabi na sa mga malls ug uban pang mga pangpublikong mga dapit. Ang mensahe sa text nagkanayon: “ATTENTION! This was confirmed by Gen. Bato’s staff. Hello everyone in Cebu, please stay clear off malls for the time being. We received intelligence of 4 women from Basilan plotting to do suicide bombings in malls in Cebu. All malls are on high alert. Thank you, Pls Pass by personal message only. Not posting on your wall for our security. Thanks (this msg is a 1st hand info from the sister of someone working sa PSG ni DU30),” sigun pa sa mensahe sa text.

Target hardening

Apan si Major General Raul del Rosario, AFP Central Command miingon nga dili angay nga mabalaka ang mga tawo sa maong impormasyon kay wala kini basihan ug kamatuoran.

“Dati na lumalabas (text scare) so far ay walang (dapat) ikabahala. Napakadaling gawin (text message) at (kahit) sino sino pwedeng gumawa,” matud pa ni Del Rosario kinsa nanawagan sa publiko nga dili dayon motuo ani nga mga text messages nga ilang madawat.

Sumala pa ni Del Rosario nga human sa pagpamomba sa Dakbayan sa Davao gialerto na ang tibuok pwersa sa AFP ug apil sa gipabantayan kanila mao ang mga entry points,  sama sa mga pantalan, roro ports, airports ug uban pa.

“Makikita ninyo ang pagsasanib ng PNP and AFP, kasama ito sa kagustuhan ng pangulo to maintain the peace and order especially in Cebu na maunlad na siyudad na dapat protektahan,” sumala pa ni Del Rosario.

Gitawag niya og “target hardening” ang ilang gipanghimo karon aron dili makasayon-sayon og sulod sa Central Visayas ang mga terorista.

Si Del Rosario miingon nga dili gayod mawala ang maong hulga bisan unsa pa ka protektado ang usa ka lugar sama sa Dakbayan sa Davao.

Tambag usab niya sa katawhan nga magpabiling kalma, dili mag-panic apan kinahanglang alisto sila sa palibot ug tabangan ang mga otoridad pinaagi sa pagtug-an kun adunay mga kadudahang butang nga ibilin sa pangpublikong lugar o ba kaha mga tawong kadudahan ang mga kalihokan.

Si Del Rosario miklaro usab nga ang pagdeklarar og “state of lawlessness” ni Presidente Rodrigo Duterte layo ra kini sa Martial Law.

Muslim community

Kagahapong adlawa sa barangay hall sa San Nicolas ning dakbayan sa Sugbo dunay dayalogo ang gihimo sa kapulisan, kasundalohan ug mga sakop sa Muslim Community nga girepresentahan sa director sa National Commission on Muslims Filipino-7, Director Malo Manunggiring.

Matud pa ni Manunggiring dili binuhatan sa usa ka tinuoray nga Muslim ang pagpatay sa mga inosente sama sa nahitabo didto sa Davao City nga ilang gikondenar. Matud niya angay nga magtinabangay ang katawhan batok sa gihimo sa mga terorista.

Andam sila mohatag og information ngadto sa kapulisan kun makadawat sila og mga impormasyon gikan sa ilang mga kaubanan sa Mindanao ug makigtambayayong sila kanunay para sa kahapsay ug kalinaw sa Sugbo. “Hindi ito bago noon pa.

We only enhance what has already been achieved dito sa Cebu,” sumala pa ni Manunggiring kinsa mipasalig nga ilaha kining buhaton agi og pagpasalamat sa mga taga Cebu nga midawat kanila ug sa ilang mga pamilya isip mga lumolupyo dinhi sa Sugbo. Ang director sa kapulisan sa dakbayan sa Sugbo, Sr. Supt. Joel Doria miingon nga human sa nahitabo sa Davao naghimo dayon sila og random checkpoints dinhi sa siyudad.

AFP nitabang

Kagahapon sa dalan N. Bacalso Avenue nakita ang mga armadong sundalo nga gi-deploy ilabi na diha sa mga tambalanan, Cebu South Bus Terminal, malls ug uban pa. Ang Bravo Company sa 47th Infantry Battalion pinangulohan sa ilang Company Commander 1st Lt. Dexter Raner kinsa miingon nga kauban nila kanunay sa ilang deployment ang kapolisan.

Si Marites Cualver, 40, residente sa Brgy. Kalunasan ning siyudad ug manindahay sa CSBT miangkon nga gikulbaan siya pagkakita sa mga sundalo kay nagtuo siyang adunay dautang nahitabo.

Apan si Cebu City Councilor Dave Tumulak, Chairman sa Committee on Peace and Order kinsa miuban sa gipahigayong visibility patrol miingon nga ang ilang gihimo kabahin kini sa pagpalig-on sa seguridad sa siyudad.

Matud pa ni Tumulak bisan asa mahimong puntariyahon sa mga terorista ug importante kinahanglan gyud nga mokooperar ang katawhan. Samtang si Mandaue City Mayor Gabriel Luis Luigi Quisumbing gusto nga padugangan pa ang kasamtangang mga Close Circuit Television (CCTV) cameras diha sa kadalanan.

Iyaha usab papun-an ang mga gamit sa kapolisan sama sa mga armas, radio, ug mga sakyanan aron mabantayan og maayo ang siyudad.

Ang hepe sa kapolisan sa Dakbayan sa Naga nga si Supt. John Clark mipalig-on usab sa ilang seguridad pinaagi sa paghatag og emergency numbers sa ilang buhatan ngadto sa mga guwardiya ug gipangusgan ang visibility patrols.

Gikondenar

Gikondenar usab sa probinsya sa Sugbo pinaagi sa usa ka resolusyon ang pagpamomba didto sa Dakbayan sa Davao.

Sa resolusyon nga gipangamahan ni Board Member Jovito Ouano nga aprubado sa provincial board mipadayag sila og simpatiya ug panaghiusa alang sa mga Davaoeños.

“Such act of violence against civilian targets are clearly intended to spread fear across the country and thus injure, both psychologically and emotionally, a  far greater number of people other than those physically present at the scene”  pagbasa sa resolution nga gipangamahan ni Board Member Jovito Ouano nga giaprubahan sa board. (Jojo Ugdol, Decemay Padilla, Romeo Limpangog, Rowena Capistrano ug Gabriel Bonjoc, Le Phyllis F. Antojado /EIM)  (BANAT NEWS)