2 patay sa pagpamusil

CEBU, Philippines - Duha ka tawo ang patay sa managlahing pagpamusil sa Dakbayan sa Sugbo niadtong nakalabay nga kadlawon.

Ala una pasado sa  kadlawon unang nabiktima sa pagpamusil ang 23-anyos nga dispatser sa Riverside, Proper Ermita nga si Rexon Bohol, dunay kapuyo ug lumad nga taga Lungsod sa Argao.

Si Police Officer 3 Edario Manatad, imbestigador sa homicide section sa Cebu City Police Office nga nahinabi sa Banat News nagkanayon nga usa sa ilang gisubay ang anggulo sa gikabikil nga grupo sa mga nanuyopay sa biktima sa maong dapit.

Nasayran nga magbisitahan sa maong dapit ang biktima aron mosuyop og drugas diin lagmit duna kini naka-away hangtud nga gibirahan.

Nagkadaiyang samad pinusilan sa lawas ang naangkon sa biktima hinungdan sa iyang kamatayon.

Narekober sa kapolisan ang duha ka basiyo sa bala sa .9mm pistol sa crime scene.

Samtang pasado alas tres sa kadlawon patay sab sa pagpamusil ang wala pa mailhi nga lalaki sa Barangay Duljo Fatima.

Sigun pa ni Manatad nga gidudahang maniyempohay sa mga butang sa maong dapit ang biktima base sa impormasyon sa mga nagpuyo sa maong dapit.

Daku ang pagduda ni Manatad nga lagmit igo lang gibawsan ang biktima sa mga nasuko niini.

Tulo ka basiyo sa bala sa .45 caliber pistol ang nakuha sa mga polis sa crime scene nga gituohang gigamit sa krimen.  (BANAT NEWS)