Top 3 sa Med Tech exams di katuo

CEBU, Philippines - Nagtuo ang Top 3 sa 2016 Medical Technologists Licensure Examinations nga si Eunice Maybelle Antonio Garcia nga dili niya makaya ang eksaminasyon tungod sa kalisud gikan sa pag-review.

Sumala pa ni Garcia nga daghang preparasyon sa iyang pagkuha sa exams apan wala kini niya gihimong babag tungod kay matag sugod ug human sa review, pag-ampo maoy iyang gihimong armas aron sa pagkab-ot sa matam-is nga kadaugan.

Gitug-an ni Garcia nga gihimo niyang unang inspirasyon ang Ginoo tungod kay maoy naghatag kaniya og kusog sa tibuok panaw sa iyang exams, ang iyang pamilya nga maoy nag-awhag kaniya kanunay ilabi na kung mobati na siya og kakapoy ug mawagtangan og gana ug lakip usab ang iyang mga higala nga iyang karamay kanunay ilabi na panahon sa review.

Si Garcia gradwado sa Cebu Doctors University isip magna cum laude, gold medal awardee sa College of Allied Medical Science ug kamanghuran sa tulo ka magsuon nga lumad nga taga Meycuayan, Bulacan ug kasamtangan nga nagpuyo sa Lapu-Lapu City.

Dugang ni Garcia nga kung hatagan siya’g higayon gusto niyang magtudlo una dayon mag-practice sa medicine.

Awhag ni Garcia sa mga mokuha og pasulit nga mosalig lang kanunay ug dili wagtangon ang pagkamaampoon aron kanunay giyahan ug ubanan sa Labaw’ng Makagagahum.

Gawas sa review center nipahigayon usab og personal review  si Garcia sa wala pa ang exams.  (BANAT NEWS)