Rama protektor sa drug lord – Duterte

CEBU, Philippines - Daghang kilay ang miiknat dihang si kanhi Cebu City mayor Michael Rama giapil ni Presidente Rodrigo Duterte sa 159 ka opisyal sa kagamhanan, huwes, kapolisan ug militar nga matud pa protektor sa mga drug lords.

Ang pagbulgar ni Duterte sa mga ngalan sa giingon niyang mga protektor sa drug lords gihimo didto sa Davao City ug gi-broadcast sa TV kagahapon sa kaadlawon.

Daghan sa mga dumadapig ni Rama nga nagtuo nga si Cebu City Mayor Tomas Osmeña maoy hinganlan ni Duterte nga protektor sa drug lord, apan baliktad ang nahitabo.

Si Osmeña nga tua karon sa Houston, Texas nagpa-medical check-up, igo lang nakapahiyom nga nasayod sa kalamboan kay daan na siya nga nagtuo nga imposible nga siya mapasanginlang protektor.

Bisan wala pa molingkod nga mayor sa dakbayan si Osmeña, mitanyag na gani siya og tag P50 mil nga premyo sa makapatay og mga drug personalities.

Rama gisakitan gyud

Abtik kaayo nga nagpatawag og press conference si Rama ug kusganong nanghimakak nga siya protektor sa mga drug lord ug sa gihapon mipadayag og suporta sa administrasyon ni Duterte sa kampanya sa drugas. Naglaom si Rama nga unta malimpyohan ra ang iyang ngalan sa pamasangil nga siya nagproteher sa mga drug lord. Nagtuo si Rama nga ang pagpapanumpa niya ni Albuera Mayor Ronald Espinosa isip sakop sa ilang partido maoy rason nga siya nadudahan.

Si Espinosa maoy amahan sa pinangita nga si Kerwin Espinosa nga nailang druglord nga nag-operate sa Eastern Visayas ug bisan na dinhi sa Sugbo.

Giangkon ni Rama nga siya ug ang iyang pamilya gisakitan kaayo sa paglambigit kaniya nga protektor sa mga drug lord.

Kaniadto si Rama gipasanginlan usab nga protektor sa mga tigpayuhot og shabu kay nakuhaan siya og hulagway nga nakigduwa og basketball kauban sa gikatahapang drug lord nga si Tata Negro.

Matud ni Rama lisud katuohan nga siya protektor sa mga drug lord nga ang mga hepe sa kapolisan nga iyang magustohan pulos gipanghulipan sa katungdanan.

Wala usab gisalikway ni Rama nga may bulok politika ang pagkalambigit sa iyang ngalan. Nahibaw-an nga ang giilang druglord nga si Jeffrey Diaz alyas Jaguar nagpuyo kaniadto sa Duljo-Fatima diin ang kapitan ug ang ubang opisyal kaalyado sa kanhi mayor. Matud ni Rama nga andam siya nga moadto sa opisina ni Duterte aron imatuod nga dili tinuod nga siya protektor sa mga drug lord.

Lista gikan sa PNP ug AFP

Si Vice Mayor Edgardo Labella nga kaalyado ni Rama, ingon man ang mga opisyal sa dakbayan nga sakop sa Team Rama, nasubo kaayo sa pamasangil nga si Rama protektor sa mga drug lord.

Nagtuo si Labella nga binuhatan kini sa mga tawo nga adunay kalagot ni Rama. Dunay mga kapitan sa barangay nga miadto sa balay ni Rama kagahapon aron pagpakita sa ilang suporta.

Si Duterte miingon nga ang listahan sa mga opisyal, huwes, kapolisan ug militar nga iyang nahuptan, gikan kini sa intelligence sa kapolisan ug militar.

Apan si Atty. Mikel Rama, anak sa kanhi mayor, miingon nga ila pa nga sutaon ang dokumento nga gihuptan ni Duterte nga gibasehan sa paglambigit sa iyang amahan.

Si Dr. Alice Utlang, pangulo sa Cebu City Office on Substance Abuse Prevention (COSAP), nahibulong lang ni Rama kay ingon sa kuwang kini og suporta sa paghimo’g kampanya batok sa drugas, ilabi na sa pagpahigayon og drugtest sa mga kawani sa City Hall. (BANAT NEWS)