Graft vs ex-Albay solon pinagtibay ng Ombudsman
MANILA, Philippines - Pinagtibay na ng tanggapan ng Ombudsman ang pagsasampa ng kasong graft at malversation laban kay dating 3rd district Albay Representative Reno Lim kaugnay ng maanomalyang paggamit ng kanyang Priority Development Assistance Fund (PDAF) noong 2007 na may halagang P27million.
Kapwa akusado ni Lim sa 4 counts ng graft at 4 counts ng malversation ang limang opisyal ng Technology Resource Center (TRC), mga representatives ng Kaagapay Magpakailanman Foundation Inc. (KMFI) gayundin si Carmelita Barredo ng C.C. Barredo Publishing House.
Akusado din dito sina TRC executives Antonio Ortiz, Dennis Cunanan, Maria Rosalinda Lacsamana, Marivic Jover at Consuelo Lilian Espiritu gayundin sina KMFI representatives Carlos Soriano at France Mercado. Pinasibak na rin ng Ombudsman sa puwesto sina Jover at Espiritu dahil sa kasong Grave Misconduct.
Sa rekord, noong Agosto at Nob. 2007, hiniling ni Lim na ipalabas ang PDAF na P30 millyon para ipambili ng 8,000 sets ng livelihood instructional materials at technology kits. Ang implementing agency ng proyekto ang TRC at KMFI bilang NGO-partner. Noong 2008, isang kasunduan ang nilagdaan ni Lim,TRC at KMFI representatives. Ang KMFI ay personal na pinili lamang ni Lim at walang naganap na bidding para sa proyekto.
- Latest
