Medical malpractice?

Laing reklamo na usab sa giingon nga medical malpractice ang mitumaw batok sa Vicente Sotto Memorial Medical Center nunot sa kamatayon sa bata nga gihimugso sa iyang inahan sulod sa naasoy nga hospital.

Midangop sa Women and Children Protection Center sa Cebu City Police Office (CCPO) ang magtiayong Edalyn ug Roldan Anoza tungod sa mapait nilang kasinatian sa VSMMC nga misangpot sa kamatayon sa ilang anak.

Una, nalandig sa public hospital sa dakbayan sa Lapu-Lapu ang inahan aron manganak apan gumikan sa kadako sa bata sulod sa iyang sabakan, gi-refer sila sa Cesarian Section sa VSMMC.

Apan matud pa nga gisinghagan ra sila sa staff sa tambalanan ug gipugos sa pagpaanak pinaagi sa normal delivery. Patay na ang bata dihang gihimugso sa inahan apan dako nga tanghaga nganong wala man gibutang sa death certificate ang hinungdan sa kamatayon niini?

Nakapadugang kini sa pagtuo sa mga ginikanan nga adunay sipyat nga nahimo ang doktor nga nagpaanak og gusto nila kini nga tagoon. Sa hulagway sa bata, naputos sa lagom ang lawas niini hinungdan nga dili nila madawat ang nahitabo ug nangayo sila og hustisya.

Atol sa akong interview ni DOH Secretary Janette Garin nakugang siya sa panghitabo tungod kay gihulagway niya nga usa sa mga top performing public hospitals ang VSMMC.

Mimando siya og imbestigasyon aron masayran kun unsa ang nahitabo ug adunay makapanubag kun masuta nga adunay nahimo nga pagpasagad sa mga nagpaanak sa naasoy’ng inahan.

Mihimo na usab og internal investigation ang VSMMC. Hinaut unta nga adunay patas nga resulta sa pakisusi nga gihimo ug mogawas ang kamatuoran.

Dili na kini bag-o pa nga reklamo batok sa tambalanan apan mokalit ra man og kahilom sa pagligid sa panahon. Akong kutloon ang pulong ni Secretary Garin "kinahanglan nga imbestigahan ang nahitabo, at the end of the day ang serbisyo ug ang care sa pasyente should not be jeopardized."

Hinaut pa nga mao ni ang mopatigbabaw.