Kayano ni Duterte
Tungod sa pagtuo nga nagpabilin ang dakong kang-a tali sa mga tagduma sa gobiyerno ug sa katawhan ug nga nagpadayon ang pagpahimus sa gahom bisan sa pasiunang kalampusan sa kampanya ni Presidente Noynoy Aquino batok sa pangurakot, gihangop ang pasalig ni President-elect Rodrigo Duterte nga wa nay pangurakot sa nasudnong panudlanan, labi na nga gidasonan dayon og pasiunang mga simbolo nga mas yano ang iyang pamunoan:
Munggos ug buwad ang gihukad nga paniudto sa unang tigom sa unang natudlo nga mga sakop sa iyang gabinete sa Davao City; ug
Baratuhon nga candies ang gidalit atol sa ikaduhang tigom sa mga sakop sa iyang opisyal nga pamilya.
* * *
Pagka karon pulos pa lang sulti ug wa pay bisan unsang aktuwal nga nahimo ang pamunoang Duterte kay karon pa mang udtong tutok sa Hunyo 30 siya makabanos sa Malakanyang. Bisan gidid-an nang mga sakop sa media pakighinabi niya ug pagtambong sa iyang kalihokan, ang iyang mga sinaligan padayong nipalili sa katawhan sa talagsaon nga mga sugo ni Duterte:
Avanza, usa sa kinabaratohan nga sakyanan sa merkado, ang ipagamit sa mga sakop sa iyang gabinete; puno ni sa nahauna niyang pasalig nga. Di siya mogamit sa special plate number 1 para sa presidente, idili sang special plates sa mga sakop sa gabinete ug nanghinaot nga mosunod ang mga opisyal sa Kongreso ug Korte Suprema.
* * *
Nisamot pa gyod ang bilib sa katawhan dihang niinsistir nga aron kalikayan ang naandan nga dakong gasto sa inagurasyon adto ra siya manumpa sa Malakanyang, kapin ra sa 500 ang mga bisita, lima ka gutlo ra ang iyang diskurso. Bisan sa iyang pagbalibad nga idungan ang ilang inugurasyon ni Vice President-elect Leni Robredo wa ikahimangod sa mga hingtungdan tungod sa iyang katin-awan: Di niya ipamugos ni Robredo ang paghigpit sa gidaghanon sa mga dinapit. Gawas pa, nakumbinser gyong katawhan nga tinuod nga yano ang inugurasyon tungod sa pahibawo nga maruya ug juice ang idalit sa mga bisita.
* * *
Apan namantsahan og gamay’ng pagduda ang kamatinud-anon sa mga simbolo ni Duterte dihang nag-helikopter si Duterte sa pag-adto sa Philippine International Convention Center (PICC) diin nagpaabot ang mga sakop sa iyang gabinete, nga nagtigom sa labing unang higayon gawas sa Davao.
Nipasalig si Duterte nga usa ray iyang kuyog--iya rang sinaligan nga si Bong Go--ang mokuyog sa inadlaw niyang flights gikan ug paingon sa Davao International ug Ninoy Aquino International Airport (NAIA) aron nga di mausik ang buhis sa katawhan. Hinaot nga may makapahinumdom niya nga di mahimong tokar-tokar lang ang pagka yano ug nga di mahimo nga magpatuyang lang siya og pa-pogi apan wa diay bisan gamay nga tinguha sa pagtuman sa iyang kaugalingong mga sugo sa kayano.
* * *
- Latest
