Comelec paabot sa reklamo batok Kris

CEBU, Philippines - Naghuwat lang karon ang Commission on Elections kun adunay reklamo nga ipasaka sa ilang buhatan kabahin sa paggamit sa queen of all media nga si Kris Aquino sa Presidential Chopper padulong sa campaign sortie sa Liberal Party.

Si Elesio Labaria, acting provincial election supervisor sa Sugbo, nagdumili paghatag og komento kabahin sa report sanglit matud niya nga kinahanglan pa kini imbestigaron kun aduna nay formal complaint.

Dugang ni Labaria nga angay usab tan-awon sa Comelec ang kalapasan sa giingong paggamit ni Aquino sa chopper sanglit sa balaud, ang kandidato maoy gidili paggamit sa pasilidad sa gobiyerno alang sa pangampanya.

“Ang balaud ana, bawal gamiton ang utility sa gobiyerno sa kandidato, dili man kandidato si PNoy ug si Kris Aquino,” matud ni Labaria.

Si Kris nakadawat og ubay-ubay nga pagsaway sa social media human nag-viral ang iyang hulagway sa paggamit sa chopper alang sa campaign sortie sa LP.

Samtang ang Office of the Deputy Ombudsman-Visayas niklaro usab nga ang Comelec maoy lead agency sa pag-imbestigar sa mga election-related issues.

Kini ang giklaro ni Atty. Maria Corazon Naraja, tigpamaba sa Office of the Ombudsman-Visayas.

“Under the Constitution, it is the Commission on Elections that is the lead agency on election related matters and issues,” tipik sa text message ni Naraja.

Giklaro usab ni Naraja nga ang paggamit sa government resources aron i-promote ang usa ka kandidato usa ka election offense. (BANAT NEWS)