Gun ban

Si Lapu-Lapu City Mayor Paz Radaza maoy labing ulahi nga lokal nga opisyal dinhi sa Sugbo nga mitahan sa iyang armas ngadto sa kapolisan alang sa muzzle taping. Kini isip sa pagsanong sa panawagan alang sa usa ka malinawong piniliay sa Mayo.

Tungod sa gun ban sa Commission on Elections, dili madala ni Radaza ang iyang armas ngadto sa kapolisan. Ug ang kapolisan na lamang ang niadto sa iyang panimalay aron sa pagtaptap sa buka niini.

Nauna nang mitahan ang ubang opisyal sa Sugbo sa ilang armas ngadto sa kapolisan isip pagtuman sa gun ban. Sa nakalabay nga semana, usa si Cebu City Councilor Dave Tumulak   mi-deposit sab sa iyang armas ngadto sa kapolisan.

Maayo kini nga lakang sa pipila nato ka lokal nga opisyal sa Sugbo. Nagpasabot kini nga mitabang sila sa tinguha sa Comelec ug kapolisan pagpatunhay sa malinawong bugno nga lugaynon sa Mayo.

Kini nga lakang sa pipila nato ka opisyal magsilbi usab nga ehemplo ngadto sa ilang kaatbang sa pulitika alang sa patas nga eleksiyon, ug sa ilang mga konstituwente sa pagsanong sa gun ban.

Apan hinaut nga dili lamang naka-concentrate ang otoridad sa mga kandidato. Kun gusto sila og tinud-anay nga kampanya alang sa malinawon nga piniliay, angay nga hingusgan sa kapolisan ang kampanya batok niadtong mga loose firearms. Kini tungod kay daghan sa mga loose firearms ang gamiton unya niadtong mga goons sa mga pulitiko. Mas kuyaw kini kun mao unya ang mahitabo. Kini tungod kay daghan sa mga kandidato sa nasud ang nagtiner og mga armadong grupo.

Hinuon dinhi sa Sugbo, walay namonitor ang kapolisan nga mga pulitiko nga nagtiner og mga goons. Mura’g kalma pa ang sitwasyon sa pulitika sa tibuok probinsiya tungod usab sa gihingusgan nga kampanya batok sa kriminalidad.

Apan kinahanglan nga dili mokumpiyansa ang otoridad. Kini tungod kay wala pa magsugod ang kampanya alang sa lokal nga mga kandidato. Kasagaran sa mga political violence sa kalungsoran anha na mahitabo pag-arangkada na unya sa kampanya sa lokal nga mga kandidato.