Samsam: Daghan wa gipaila

CEBU, Philippines - Gisaway ni Kongresista Gerald Anthony “Samsam” Gullas Jr. sa unang distrito sa probinsiya si Talisay City Mayor Johnny de los Reyes.

Kini human giingong mobiya sa Liberal Party gumikan kay wala siya gipaila nila ni Presidente Benigno Aquino III ug presidential candidate Mar Roxas sa rally sa Dakbayan sa Mandaue.

Matud ni Gullas nga ang gihimo ni JVR usa ka butang nga makadaut sa grupo nila ni Roxas ug sa ubang kandidatu sa LP aron unta makakuha og solido nga boto sa una’ng distrito.

Gihulagway sa kongresista nga dili sinsero ang mayor sa pagsuporta ni Roxas, Gobernador Hilario Davide III ug ni Bise Gob. Agnes Magpale.

Si Mayor JVR ug iyang grupo makigtagbo sa mga opisyal sa LP aron tukion ang posible nga pag-uli sa maayong kabubut-on.

Asoy ni Gullas nga dili lang si JVR ang wala na-acknowledged atol sa rally kun dili lakip na ang ubang mayor sa Sugbo nga sakop sa LP.

Iyang nahinumduman nga gawas niya ug sa iya’ng apohan nga si kanhi kongresista Eduardo Gullas, gihisgutan sab ang pangan nila ni Mayor Jonas Cortes sa Dakbayan sa Mandaue, Kong. Gabriel Luis Quisumbing sa ikaunom nga distrito, kanhi mayor Tomas Osmeña sa Siyudad sa Sugbo, Kong. Rodrigo Abellanosa sa South District sa Siyudad sa Sugbo, Mayor Paz Radaza sa Dakbayan sa Lapu-Lapu ug ang iyang anak nga si Kong. Aileen Radaza.

Lakip nga nahinumduman ni Gullas nga sila si Mayor Elanito Peña sa Lungsod sa Minglanilla, Mayor Valdemar Chiong sa Siyudad sa Naga, Mayor Nicepuro Apura sa Siyudad sa Carcar ug Mayor Teresa Alegado sa Lungsod sa Consolacion ang wala nasangpit sa kadagkuan sa LP.

Nagkanayon si Gullas nga ang ubang mayor sa probinsiya wala nanumbaling niini nga wala sila nahisguti sa mensahe ni Roxas.

Alang niya si JVR dili sinsero sa paglaban sa LP ug nangita lang og rason aron nga mogawas sa grupo alang sa iyang kaugalingong interest ug katuyuan. Dugang pa niya nga bisan gani nga dili sila LP padayon ang ilang pagsuporta sa kandidatura ni Roxas, Davide ug Magpale.

Gani iyang gihangyo si Davide kaniadto nga ideklarar ang unang distrito nga "free zone" aron ang tanang magkaribal nga partido mosuporta sa tulo ka kandidato.

Iyang gipasalig ngadto ni Roxas nga bisan og moambak sa laing partido si JVR, ang Alayon ang padayon nga mosuporta sa LP.

Samtang si JVR sa iyang bahin nitug-an nga usa sa dakong opisyal sa LP ang nitawag kaniya aron sa pagpangayo og pasaylo sa nahitabo ug gihangyo nga magpabilin sa LP.

Apan asoy niya nga bisan og mopadayon siya sa pagsuporta sa LP, ang mga Gullas ra gihapon ang suportahan ni Roxas.

Andam gihapon maminaw si JVR sa panahum sa LP sa higayon nga adunay panagtagbo.

Dugang pa niya nga ang kampo nila ni presidential candidate Rodrigo Duterte ug Bise Presidente Jejomar Binay ang nidapit kaniya aron moapil sa ilang grupo.

Siya niasoy nga si Mayor Michael Rama sa Siyudad sa Sugbo ang nitawag kaniya ug niagni nga adto motapon sa grupo ni Binay sa United Nationalist Alliance (UNA). Lakip nga nidapit kaniya mao si gubernatorial candidate Boyet Cortes. Hinuon si JVR nitataw nga plano niyang pakigkitaan ang tanang grupo nga niagni kaniya sa dili pa mohimo og desisyon kun asa gyud siya mopasilong. (BANAT NEWS)